माओवादीयात पिने तयाः शान्ति प्रक्रिया पूवनीमखु : केबी राजन
नेपाःया निंतिं भारतया पुलाम्ह राजदूत नापं नेपाः सम्बन्धि विज्ञ केबी राजनं माओवादीयात पिने तयाः शान्ति प्रक्रिया पूमवनीगु खँ धयादीगु दु । वय्कलं यदि माओवादीयात पिने तःसा शान्ति प्रक्रिया हे भंग जुइगु नं धयादिल ।
बीबीसी नेपाली सेवानाप शनिवाः खँल्हाबंला यानादिसें राजनं संविधानसभाया म्याद थपया विषयलय् भारत सरकारं छुं नं भूमिका म्हिता च्वंगु जूसाः उकिया बारे थःम्ह मस्यूगु धयादिसें यदि भारतं माओवादीयात पिने तयेत स्वःसा व भारतया दुरदृष्टि मजुइगु धयादिल ।
वय्कलं नेपाःया माओवादी सरकारं पिहांवनेवं भारतनाप इमिगु स्वापु छुं भचा बांमलागु स्वीकार यानादिसें वय्कलं आः धाःसा माओवादी व दिल्लीया निरन्तर स्वापु जुयाच्वंगु धयादिल । नेपाःया माओवादीं थःपिं पिने तयाः नेपाः व भारतया स्वापु बांलाय् मफइगु खँ बांलाक सिउगु दाबी नं वय्कलं यानादिल ।
छुं दँ न्ह्यः नेपालय् भारत तसकं सक्रिय जूगु धकाः प्रचार जूगु धयादिसें राजनं नेपालय् भारतं हस्तक्षेप याःगु धकाः संका मजुइमाः धकाः भारत तसकं संवेदनशील व होसियार जूगु धयादिल ।
