स्वंगू दलया निर्णायक वार्ता सुरु

प्रमुख स्वंगू दलत दथुइ संविधानसभाया म्याद थपया विषयलय् सहमति यायेत वार्ता सुरु जूगु दु । न्हू बानेश्वरस्थित संविधानसभा भवनय् माओवादी, कांग्रेस व एमालेया शीर्ष नेतात दथुइ मुँज्या सुरु जूगु खः । मुँज्याय् माओवादीं लडाकु समायोजन व शान्ति प्रक्रियाया बारे प्रस्ताव न्ह्यब्वइगु जूगु दु ।

माओवादीं थःगु प्रस्तावय् कार्यतालिका दयेकाः शान्ति प्रक्रिया क्वचायेकीगु, न्यान्हुया दुने समायोजन मोडल क्वःछिइगु, समायोजन जुइपिं लडाकुतय् मापदण्ड दयेकाः लडाकुतय् वर्गीकरण यानाः शान्ति प्रक्रियायत तीव्रता बीइगु खँ दुथ्याकातःगु दु ।

अथेहे माओवादीं थःपिनि नेतातय् सुरक्षाय् खटे जूपिं जनसेनायात लडाकु शिविर छ्वयेगु खँय् लचकता क्यनीगु खँ धाःगु दु । संविधानसभा सभाया म्याद थप यायेगु ई धाःसा सहमितइ क्वःछिइगु खँ माओवादी प्रस्तावय् न्ह्यथनातःगु दु ।