एमालें फुक्कसितं मान्य जुइगु सहमतिया निंतिं पहल याइगु

आकस्मिक रुपं च्वंगु नेकपा (एमाले) स्थायी समिति मुँज्यां संविधानसभाया म्याद थपया निंतिं फुक्कसितं मान्य जुइगु सहमतिया निंतिं पहल यायेगु निर्णय याःगु खः । एमालें माओवादी व कांग्रेसं थःथःगु अडाना कयाच्वंगु इलय् सहमतिया निंतिं अन्तिम ई तक कुतः यायेगु नं निर्णय याःगु दु ।

एमाले संसदीय दलया मुँज्या स्थगित यानाः प्रधानमन्त्री नापं एमाले नायः झलनाथ खनालं सःतुगु स्थायी समिति मुँज्यां सहमतिया आधारय् संविधानसभाया म्याद थप यायेमाःगु निर्णय याःगु दु । एमालें शान्ति प्रक्रिया व संविधान निर्माणया विकल्प मदुगु धासें शान्ति व संविधान सुनिश्चितता यायेमाःगु खँय् बः बिउगु दु ।