संसद मुँज्या अन्यौलय् / संविधासभा भवन पिने व्यापक प्रदर्शन
संविधानसभाया म्याद क्वचायेत नीप्यघौ स्वयां म्हो ई जक ल्यँ दुगु इलय् नं व्यवस्थापिका संसदया मुँज्या च्वनेफुगु मदुनी । थौं सुथय् ८बजेया निंतिं सःतुगु मुँज्या प्रमुख स्वंगू दलत दथुइ सहमति मजूनिगुलिं च्वनेमफुगु खः । सुथय् हे संविधानसभा भवन थ्यंकूपिं सभासदत धाःसा स्वंगू दलया नेतात सहमति यानाः वइगु ई पियाच्वंगु दु ।
स्वंगू दलत दथुइ सहमति मजुयाः संसदया मुँज्या अन्यौलय् लानाच्वंगु इलय् संविधानसभा भवन पिने धाःसा व्यापक रुपं प्रदर्शन जुयाच्वंगु दु । संविधानसभाया रक्षाया निंतिं म्याद थप यायेमाःगु धासें थीथी राजनीतिक दलया भातृ संगठन, थीथी पेशगत संघसंस्था, जातिय खलः पुचः लगायत आपालं मनूत अन जम्मा जूगु दु ।
संविधानसभा विघटन यानाः न्हूगु जनादेशय् वनेमाःगु माग तयाच्वंगु राप्रपा नेपालं नं संविधानसभा भवन पिने प्रदर्शन यानाच्वंगु दु । पुलांगु बानेश्वर वनेगु सतकय् च्वना राप्रपा नेपालं सभा व प्रदर्शन यानाच्वंगु दु ।
News Location:
