स्वंगू दलया मुँज्या निष्कर्षबिहीन / कन्हय् निर्णायक वार्ता
संविधानसभाया म्याद क्वचाये छन्हु न्ह्यः जूगु प्रमुख स्वंगू दलया मुँज्या नं निष्कर्षबिहीन जुयाः क्वचाःगु दु । थौंया मुँज्याय् नं दलत दथुइ सहमति मजुइवं आः कन्हय् संविधानसभाया लिप्पांगु न्हि दलतय्सं निर्णायक वार्ता याइगु जूगु दु । कन्हय् ११बजे स्वंगू दलया मुँज्या च्वनीगु ज्याझ्वः दु ।
गोकर्ण रिसोर्ट व प्रधानमन्त्री निवास लिपा थौं सिंहदरवारस्थित शान्ति मन्त्रालयय् स्वंगू दलया मुँज्या च्वंगु खः । तर स्वंगू थीथी थासय् मुँज्या च्वंसां स्वंगू दलत स्वाथाय् हे स्वायेवं मुँज्या उपलब्धिहिन जूगु खः । थौंया मुँज्याय् नं स्वंगू दलं थःथःगु हे आडन कायेवं मुँज्याय् छुं प्रगति मजूगु खः ।
शान्ति मन्त्रालयय् सुथय् व न्हिनय् यानाः निक्वः तक च्वंगु मुँज्याय् कांग्रेसं माओवादी लडाकु व ल्वाभः अलग जुइमाःगु अडान काःगु खःसा माओवादीं समायोजन प्रक्रिया सुरु जुइवं लडाकु व ल्वाभः स्वतः अलग जुइगु धासें आः हे ल्वाभः सरकारयात लःल्हाये मफइगु अडान काःगु खः ।
'लडाकुत विशेष समिति मातहत वयेधुंकूगुलिं आः हानं ल्वाभः व लडाकु अलग यायेगु खँ तर्कसंगत मजू, माओवादी उपाध्यक्ष नारायणकाजी श्रेष्ठ 'प्रकाशं' धयादिल, 'समायोजन प्रक्रिया सुरु जुइवं लडाकु व ल्वाभः स्वतः अलत जुइ ।'
कांग्रेस सभापति सुशील कोइरालां थौंया मुँज्याय् छुं नं प्रगति मजूगु धयादिसें माओवादीं लचकता मक्यंगुलिं सहमति जुइमफुगु द्वपं बियादिल ।
News Location:
