हिलिसे हिलाः कयाःगु ल्वाभ: अःपुक्क लःल्हायेमखु : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' हिलिसे हिलाः कयाःगु ल्वाभ: अःपुक्क लःमल्हायेगु स्पष्ट यानादीगु दु ।
शहीद पत्रकार लिसें साहित्यकार कृष्णसेन इच्छुकया गुक्वःगु स्मृति दिवसया लसताय् थौं येँया पर्यटनबोर्डय् ग्वसाः ग्वःगु स्मृति सभाय् न्वंवानादिसें नायः प्रचण्डं हिलिसे हिलाः कयाःगु ल्वाभ: अःपुक्क लःमल्हायेगु स्पष्ट यानादीगु खः ।
देय्या स्वाधीनता व जनताया मुक्तिया नितिं वर्तमान मोर्चा त्याइगु दृढता प्वंकादिसें नायः प्रचण्डं ल्वापुया मोर्चापाखें बिसुं मवनेगु बरु छाती फयाः शहीद जुइगु धयादिल । क्रान्तिया लँपु अःपु मजूगु न्ह्यःथनादिसें वय्कल द्वलंद्वः शहीदया म्हगसयात घात यायेगु ज्या मजुइगु स्पष्ट यानादिल ।
ज्याझ्वलय् माओवादीया वरिष्ठ न्वकु लिसें इच्छुक सांस्कृतिक प्रतिष्ठानया नायः मोहन वैद्य 'किरणं' शहीदया आशा, अपेक्षा व म्हगस पूवंकेगु धयादीगु दु । वय्कलं क्रान्ति न्ह्यानाच्वंगु स्पष्ट यानादिसें माओवादीं सुंलिसे नं क्वःमछुसे क्रान्तिया ध्वाँय् ल्ह्वनाः च्वनेगु धयादिल ।
