झिगू बुँदे सर्त पूमवंक म्याद थप मयायेत मधेशी मोर्चापाखें दबाव
संविधानसभाया म्याद थपया निंतिं झिगू बुँदे सर्त न्ह्यने हःगु नेपाली कांग्रेसयात उगु सर्त पूमवंकं संविधानसभाया म्याद थप मयायेत मधेशी मोर्चां दबाव बिउगु दु ।
प्रमखु स्वंगू दलत दथुइ थौं वार्ता जुइ न्ह्यः मोर्चाया स्वंगूलिं दलया शीर्ष नेतात कांग्रेस सभापति सुशील कोइरालाया महाराजगञ्जय् च्वंगु छेँय् थ्यंकाः उगु दबाव बिउगु खः । मोर्चां झिगू बुँदे सर्त नापं मधेशीतय्त सेना समुदायत प्रतिनिधित्व याकेमाःगु व छगू मधेश छगू प्रदेशया व्यवस्था यायेमाःगु माग नं याःगु ख: ।
कांग्रेस व मोर्चा दथुइया मुँज्याय् संविधानसभाया म्याद थप व राष्ट्रिय सहमतिया बारे खँल्हाबंला जूगु खँ नेतातय्सं धाःगु दु । मुँज्याय् कांग्रेस सभापति सुशील कोइराला, उपसभापति रामचन्द्र पौडेल, मोर्चा आवद्ध तराई-मधेश लोकतान्त्रिक पार्टीया नायः महन्त ठाकुर, मधेशी जनअधिकार फोरम लोकतान्त्रिकया नायः विजयकुमार गच्छदार व सद्भावना पार्टीया नायः राजेन्द्र महतोया ब्वति दुगु खः ।
