थज्याःगु जुइ आः वइगु राष्ट्रपति शासन !
येँ (सन्ध्या टाइम्स)/संविधानसभाया म्याद थपे मजुल धाःसा छु जुइ? थुकिया बारे आः तक सुनां नं छुं बिचाः मयाःनिसां नेपाली कांग्रेसया संस्थापन पक्षं धाःसा थुकिया बारे 'होमवर्क' समेत याना तयेधुंकूगु दावी छगू सूत्रं याःगु दु ।
विज्ञ सुत्रं बिउगु जानकारी कथं संविधानसभाया म्याद थपे मजुइवं वयां लिपा राष्ट्रपति शासन लागू यायेगु तयारी कांग्रेसया संस्थापन पक्षं यानातयेधुंकूगु दु। संविधानसभा भंग जुइसातकि सेनाया ग्वाहालि कयाः राष्ट्रपतिं शासनसत्ता कायेगु व वयां लिपा दैनिक ज्याखँ सञ्चालनया लागिं संसदय् दुथ्याःगु फुक्कं पार्टी सम्मिलित यानाः राष्ट्रिय सरकार गठन यायेगु ग्वसाः दु। राष्ट्रपति शासन लागू यानाः राष्ट्रिय सरकार गठन याके बीगु लागिं मधेसय् आन्दोलन याकाः जूसां दवाव बीकेगु नं कांग्रेस संस्थापन पक्षया ग्वसाः दु ।
राष्ट्रिय सरकार गठन यायेधुंकाः संविधान निर्माणया ज्या यायेगु लागिं विज्ञतय्गु छगू पुचः गठन याइगु ग्वसाः दु। उगु पुचलं संविधानसभापाखें आः तक तयार यायेधुंकूगु फुक्क दस्तावेजत मुंकेगु व व उकियात छथाय् तयाः छगू पूर्ण संविधान दयेकेगु ज्या याइ। उगु संविधानयात जनताया दथुइ यंकाः माःगु संशोधन याइ। अले वहे राष्ट्रिय सरकारं न्हूगु चुनाव याकाः न्हूगु संसद गठन याइ व उगु न्हूगु संसदं संविधानयात अनुमोदन यानाः लागू याकेगु होमवर्क जुयाच्वंगु खँ सूत्रं कंगु दु ।
