मधेसी मोर्चापाखें कोइरालायात दबाब
येँ (सन्ध्या टाइम्स)/लोकतान्त्रिक मधेसी मोर्चाय् आबद्ध जुयाच्वंगु दलया नेतातय्सं थौं सुथय् नेपाली कांग्रेसया सभापति सुशील कोइरालायात नापलानाः एकीकृत माओवादीं ल्वाभः लःमल्हाःतले गुगुं नं हालतय् संविधानसभाया म्याद थप मयायेत दबाब बिउगु दु। थौं कोइराला निवासय् वनाः मधेसी नेतातय्सं अथे दबाव बिउगु खः ।
कोइरालायात नापलानाः लिहां वयेधुंकाः तराई मधेस लोकतान्त्रिक पार्टीया अध्यक्ष महन्थ ठाकुरं संविधानसभाया म्याद थप व राष्ट्रिय सहमतिया विषयय् सहलह जूगु खँ संचारकर्मीतय्त कनादिल। वय्कलं धयादिल, 'ल्वाभः लःमल्हाःतले म्याद थप याये हे मजिउ धइगु प्यंगू अडान तयेगु ज्या जूगु दु।' मोर्चां जेठ १४ न्ह्यः हे ल्वाभः लःल्हायेमाःगु, समग्र मधेस छगू प्रदेश, सेनाय् मधेसीतय्गु मंकाः प्रवेश व प्रधानमन्त्रीया राजीनामायात मागया रुपय् न्ह्यब्वःगु खः ।
अथे भेटवार्ता जूगु इलय् मधेसी जनअधिकार फोरम लोकतान्त्रिकया अध्यक्ष विजयकुमार गच्छेदार व सद्भावनाया अध्यक्ष राजेन्द्र महत्तो नं दुगु खः ।
मधेसी मोर्चाय् निगू दल थप
स्वन्हु न्ह्यः जक मधेसी जनअधिकार फोरमपाखें कुचा जुयावंगु जेपी गुप्ताया नेतृत्वय् दुगु मधेसी जनअधिकार फोरम गणतान्त्रिक नं संयुक्त लोकतान्त्रिक मधेसी मोर्चाय् दुहां वनीगु जूगु दु ।
अथे हे प्यला न्ह्यः तराई मधेस लोकतान्त्रिक पाटीपाखें कुचा जुयावंगु तराई मधेस लोकतान्त्रिक पार्टी नेपाल नं थौं उगु मोर्चाय् दुहां वनीगु जूगु दु। उगु निगू मधेसी दलत नं दुहां वन धाःसा मधेसी मोर्चाया सभासदत ७१ थ्यनी। थ्व ल्याखं मोर्चाया आकार आः धमाधम तःधं जुया वनाच्वंगु दु। थ्व मोर्चाय् आः उपेन्द्र यादवया मधेसी जनअधिकार फोरम छगू जक मथ्यंनि ।
