थौं जनजातिपाखें संविधानसभा घेराउ

येँ (सन्ध्या टाइम्स)/जातीय पहिचान सहितया प्रदेशतय्गु सुनिश्चितता नापं आदिवासी जनजाति मैत्री संविधान दयेकेमाःगु माग यासें आदिवासी जनजातिय्सं थौं येँय् छगू तःधंगु प्रदर्शन यासें न्हू वानेश्वर स्थित संविधानसभा भवन घेरे यायेत्यंगु दु ।

थुकिया निंतिं थौं स्वनिगःया झिंनिगू थासं जुलुस पिकायेगु ग्वसाः दयेकातःगु दु। स्वनिगःया झिंनिगू थासं पिहां वःगु जुलुस न्हू वानेश्वरय् मुनाः संविधानसभा भवन घेरे यायेगु ज्याझ्वः दयेकूगु खः ।

नेवाः स्वायत्त राज्य मंकाः संघर्ष समिति नापं आदिवासी जनजातिया थीथी संघर्ष समिति नापं नेपाल आदिवासी जनजाति महासंघ तकं दुथ्याःगु आदिवासी जनजाति संयुक्त संघर्ष समितिया आह्वानय् थौं थ्व जुलुस व संविधानसभा घेराउ ज्याझ्वः यायेत्यंगु खः ।

न्हिनय् १२ बजेपाखे थीथी थासं जुलुस पिकायेगु शुरु नं जुइधुंकूगु दु। जुलुसय् आदिवासी जनजातितय्सं थःथःपिनिगु सांस्कृतिक झाँकी नं ज्वना वःगु खः। अथे जुलुस पिकाये धुंकाः छगू तःधंगु सभा यायेगु तकं ग्वसाः दुगु खँ नेवाः स्वायत्त राज्य मंकाः संघर्ष समितिं धाःगु दु।
अथे हे जनजातितय्सं कन्हय् व कंस निन्हु नं लगातार संविधानसभा भवनया पिने धर्ना यायेगु ज्याझ्वः घोषणा यायेधुंकूगु दु। संविधानसभा भवन पिने जुलुस धर्ना याये मदइगु निषेधित क्षेत्र धकाः प्रशासनं धयातःगु कारणं अन धर्ना च्वं वइपिंत प्रहरीं ज्वने नं फु धाःगु दु।

झिंनिथासं झिंनिगू जुलुस
थौं संविधानसभा घेराउ यायेगु लागिं नेवाः लगायत थीथी जनजातितय्सं येँदेय्या झिंनिगू थासं जुलुस पिकायेगु तयारी यानाच्वंगु दु। थुकी थीथी जातियात थीथी हे थासं जुलुस पिकयाः संविधानसभा भवन थ्यंकेगु जिम्मा बियातःगु दु ।

१) येँया लुँहितिः येँया नेवाःत
२) त्रिपुरेश्वर: किपू नापं येँया दक्षिण पश्चिम लागाया नेवाःत
३) यलया मंगः: यलया नेवाःत
४) कोटेश्वर: ख्वपया नेवाःत
५) लैनचौर: छन्त्याल, थकाली, दुरा, बराम, सियार व माझी
६) माइतिघर: तामाङ, मगर, चेपाङ, पहाडी, धनुक
७) सातदोबाटो: राई, लिम्बु, याक्खा व सुनवार
८) पुलांगु बानेश्वर: थारू व तराईया आदिवासी जनजाति
९) चाबही: शेर्पा, भोते, तोप्केगोला, ल्ह्योमि, जिरेल, हेल्मो, दोल्पो व थुदन
१०) अनामनगर: आदिवासी जनजाति महिला महासंघ, भुजेल व वालुङ
११) भृकुटीमण्डप: गुरुङ व आदिवासी जनजाति विद्यार्थी महासंघ
१२) तीनकुने: आदिवासी जनजाति युवा महासंघ, कुमाल, जिरेल व थामी ।