म्याद थपे याये मजिउगु सर्वोच्चया फैसला

संविधानसभाया म्याद हानं थपे यायेगु लाकि मयायेगु धकाः वहस जुयाच्वंगु हे इलय् वयाः सर्वोच्च अदालतं संविधानसभाया म्याद बारम्बार थपे याना च्वने मजिउ धइगु फैसला म्हिगः याना बिउगु दु। प्रधानन्यायाधीश खिलराज रेग्मी समेत दुथ्याःगु पूर्ण इजलाशं उगु निर्णय याःगु जुयाः थुकिया बिस्कं महत्व दुगु खँयात नजरअन्दाज याये मछिं ।

देशय् दक्व हे राजनीतिक पार्टीत कानुनी राजया वकालत याइपिं खः। आः सर्वोच्च अदालतं वहे कानूनया लिधंसा कयाः संविधानसभाया म्याद संकटकाल लगे यानाः खुला थपे यायेगु बाहेक मेगु थपे यायेगु पाय्छि मखु धकाः फैसला याःगु खः। थ्व ल्याखं आः संविधानसभाया म्याद दछि थपे यायेगु धकाः दलतय् दथुइ गुगु अभ्यास जुयाच्वंगु खः, उकियात न्ह्यःने यंकेगुया औचित्य मंत। यदि राजनीतिक दलत धाथें कानुनी राजयात माने याइपिं खःसा आः संविधानसभाया म्याद दछि गय् यानाः थपे यायेगु धकाः सिबें नं संविधानसभाया विकल्पय् छु याये माली धकाः सहलह यायेगुपाखे लगे जुइमाःगु खनेदु। संविधानसभाया म्याद आः हानं थपे याये दइ मखुत धइगु कानुनी फैसला खः। अज्याःगु अवस्थाय् राजनीतिक निर्णय यानाः निकास पिकायेगु ज्या नं यायेफु। आः राजनीतिक पार्टीतय् सहलहया विषय थ्व जुइमाः थें च्वं। संविधानसभाया म्याद थपे यायेगु धकाः सहलह जुयाच्वंगु इलय् लाक्क हे सर्वोच्चं थज्याःगु निर्णय याःगुया अर्थ उकथंया ज्या मजुइमा धकाः हे जुइमाः। यदि दलतय्सं उकियात वेवास्ता यानाः न्ह्याः वन धाःसा थ्व सरासर हे कानुनी राजयात वेवास्ता याःगु जुइ। थ्व बारे नं सहलह जुइमाःगु दु ।