स्वंगू दलया मुँज्या हानं निष्कर्षबिहीन
संविधानसभाया म्याद थपया निंतिं सहमति यायेत थौं च्वंगु प्रमुख स्वंगू दलया मुँज्या हानं निष्कर्षबिहीन जूगु दु । स्वंगू दलत दथुइ बुधवाः गोकर्ण रिसोर्टय् जूगु वार्ता नं निष्कर्षबिहीन जुइवं सहमति यायेगु जिम्मा स्वंगू दलया शीर्ष नेतातय्त बिउगु खः ।
स्वंगूलिं दलया शीर्ष नेतात सहित प्रधानमन्त्री निवास बालुवाटारय् थौं च्वंगु मुँज्याय् स्वंगूलिं दलं थःथःगु अडान काःगुलिं मुँज्या निष्कर्षबिहीन जूगु जानकारी कांग्रेस नेता डा. रामशरण महतं बियादिल । तर सहमतिया कुतःयात धा:सा राजनीतिक दलतय्सं अझ नं निरन्तरता बीगु जूगु दु ।
माओवादी न्वकु मोहन वैद्य 'किरणं' थौंया मुँज्या लिपा अझ नं सहमतिया सम्भावना दनीगु धयादिसें कन्हय् हानं सहमतिया निंतिं स्वंगू दलत दथुइ वार्ता जुइगु धयादिल ।
थौंया मुँज्याय् प्रधानमन्त्री झलनाथ खनाल, एमालेपाखें मूछ्याञ्जे इश्वर पोखरेल व नेता भीम रावल, माओवादीपाखें नायः पुष्पकमल दाहाल 'प्रचण्ड', न्वकुत मोहन वैद्य व डा. बाबुराम भट्टराईया ब्वति दुगु खः । अथेहे कांग्रेसपाखें सभापति सुशील कोइराला, महामन्त्री कृष्ण सिटौला व नेतात डा. रामशरण महत व डा. मिनेन्द्र रिजालया ब्वति दुगु खः ।
News Location:
