'संविधनसभाया म्याद क्वचाये न्ह्यः हे सहमित याः'
नेपाः स्थित थीथी झिगू देय्या राजदूतय्सं संविधानसभाया म्याद क्वचाये न्ह्यः हे सहमति मालेत राजनीतिक दलतय्त इनाप याःगु दु । झिगू देय्या राजदूततय्सं थौं छगू मंकाः विज्ञप्तिइ पिथंसें संविधानसभाया म्याद क्वचाये न्ह्य: ल्यँ दुगु इलय् फुक्कं राजनीतिक दलतय्सं लचकता क्यनाः विवादित मुद्दाय् समाधन मालेत इनाप याःगु दु ।
विज्ञप्तिइ राजदूततय्सं नेपाःया राजनीतिक घटनाक्रमयात सतिकं स्वयाच्वंगु खँ न्ह्यथनातःगु दु । 'शान्ति प्रक्रियायात निष्कर्षय् थ्यंकेत, प्रजातान्त्रिक व समावेशी न्हूगु संविधान च्वयेत, संविधानसभाया म्याद थपया निंतिं सहमति यायेत राजनीतिक दलत दथुइ वंगु छुं हप्ता निसें जुयाच्वंगु सहलहयात झीसं बिचाः यानाच्वंगु दु' विज्ञप्तिइ न्ह्यथंगु दु ।
युरोपेली युनियनया दुजः राष्ट्र डेनमार्क, फिनल्याण्ड, फ्रान्स, जर्मनी, बेलायत व युरोपेली युनियनया प्रतिनिधिमण्डल लगायत नर्वे व स्वीट्जरल्याण्ड तथा अष्ट्रेलिया, जापान व अमेरिकां उगु मंकाः विज्ञप्ति पिकाःगु खः ।
