जेठ १४ दुने हे सहमति यनादिसँ : राष्ट्रपति
राष्ट्रपति डा. रामवरण यादवं प्रमुख दलया शीर्ष नेतातय्त जेठ १४ गते दुने हे राजनीतिक सहमति यायेत इनाप यानादीगु दु ।
प्रमुख स्वंगू दल माओवादी, कांग्रेस व एमालेया शीर्ष नेतात पुष्पकमल दाहाल 'प्रचण्ड', सुशील कोइराला व प्रधानमन्त्री झलनाथ खनालनाप बिहीवाः सुथय् राष्ट्रपति भवन शितल निवासय् जूगु खँल्हाबंलाय् वय्कलं याकनं सहमति यायेत इनाप यानादीगु खः ।
'राष्ट्रपति यादवं राजनीतिक दलत दथुइ जुयाच्वंगु सहमतिया बारे च्यूताः प्वंकादिल, 'प्रधानमन्त्री झलनाथ खनालं धयादिल, 'वय्कलं यथाशीघ्र राजनीतिक दलत दथुइ सहमति यायेत इनाप यानादिल ।'
स्वंगू राजनीतिक दलया शीर्ष नेतात दथुइ जुइगु मुँज्या स्वंया न्ह्यः राष्ट्रपति भवन थ्यंकूपिं स्वम्ह नेतातनाप राष्ट्रपतिं सहमतिया निंतिं जुयाच्वंगु कुतःया बारे च्यूताः प्वंकादीगु खः । उगु इलय् नेतातय्सं राजनीतिक दलत दथुइ जुयाच्वंगु वार्ता बारे ब्रिफिङ याःगु जानकारी प्रधानमन्त्री खनालं बियादिल ।
खँल्हाबंला लिपा प्रधानमन्त्री खनालं सहमतिया विकल्प मदुगु धयादिसें सम्भवतः थौं हे स्वंगू दलत दथुइ सहमति जुइगु विश्वास प्वंकादिल । उखे कांग्रेस सभापति कोइरालां थःपिं झिगू बुँदे सर्त पूमवंकं सहमति मयायेगु धयादिल ।
News Location:
