कन्हय् जनजातितय् बृहत प्रदर्शन

जातीय स्वायत्तता, स्वाशसन लगायतया माग यानाः कन्हय् आदिवासी जनजातितय्सं येँय् छगू बृहत प्रदर्शन यायेत्यंगु दु । आदिवासी जनजाति संयुक्त संघर्ष समितिया आव्हानय् जुइत्यंगु प्रदर्शनय् लखौं मनूतय्त सतकय् क्वकायेगु ताः तयातःगु दु । कन्हय्या प्रदर्शनयात जनजातितय्सं थःगु शक्ति प्रदर्शन यायेगु कथं कयातःगु दु ।

समितिं स्वनिगःया थीथी थासय् मुनाः न्हू बानेश्वरस्थित संविधानसभा भवन न्ह्यने छगू आमसभा याइगु ज्याझ्वः दयेकात:गु ख: । तर जिल्ला प्रशासनं संविधानसभा जःखया ५० मिटर तक निषेधित क्षेत्र घोषणा यानातःगुलिं निषेधित क्षेत्रय् मलाइगु थासय् आमसभा जुइगु जानकारी संयुक्त संघर्ष समितिं बिउगु दु ।

समितिया कथं कन्हय् न्हिनय् १२बजे थःथःगु जातीय वसः, ध्वाँय् व ब्यानर ज्वना थीथी थासय् मुनाः पिहांवइगु जुलुस बानेश्वर थ्यंकीगु ज्याझ्वः दु । ज्याझ्वः कथं नेवाःत येँया बसन्तुली व यलया मंगलय्, गुरुङ, छन्त्याल, थकाली, बराम, सियार, दुराल व माझीत येँया लैनचौरय्, तामाङ, मगः, चेपाङ्ग, पहरी व धानुक माइतिघर मण्डलाय्, राई, लिम्बु, याक्खा व सुनुवार यलया सातदोबाटोय्, थारु व तराईया आदिवासीत पुलांगु बानेश्वरय् मुनाः थःथःगु सांस्कृतिक झाँकी सहित बानेश्वर थ्यंकी ।

अथेहे शेर्पा, भोटे, तोक्पेगोला, ल्होमी, जिरेल, ह्याल्मो, डोल्पो, थुदाम, येँया चाबहिली, आदिवासी मिसा, भुजेल व वालुङ समुदाय अनामनगरय्, आदिवासी विद्यार्थी महासंघ भृकुटीमण्डपय्, आदिवासी युवा महासंघ नापं कुमाल, जिरेल व थामी समुदाय तिनकुने मुनाः बानेश्वर थ्यंकीगु ज्याझ्वः दु ।

संयुक्त संघर्ष समितिं छु माग यानाच्वंगु दु?

- जाति, भाषा, पहिचानया लिधंसाय् आदिवासी जनजातितय् ऐतिहासिक थासय् आत्मनिर्णय, राजनीतिक अग्राधिकार, स्वशासन, स्वायत्त राज्य सहितया राज्यपुनसंरचना जुइमा:गु ।

- धर्मनिरिपेक्षता, संघीयता व लोकतान्त्रिक गणतन्त्र न्हूगु संविधानय् सुनिश्चित यायेमा:गु ।

- थीथी मितिइ नेपाल सरकार व आदिवासी जनजाति संघसंस्था, रजनीतिक दलत दथुइ जूगु सम्झौतात कार्यन्वयन जुइमा:गु ।

- भाषिक समानता व बहुभाषिक नीति अन्तर्गत केन्द्रीय स्तरय् राज्य भाषाया नं समान छ्यलाबुलाया सुनिश्चितता व मातृभाषाया‍ माध्यमं उच्चतह तक निःशुल्क शिक्षाया अधिकार दयेमा:गु ।

- समावेशी व जातीय जनसंख्यया आधारमा पूर्ण समानुपातिक निर्वाचन प्रणाली जुइमा:गु ।

- अन्तर्राष्ट्रिय श्रम संगठनया आदिवासी जनजाति अभिसन्धी १६९ व आदिवासी जनजातिया अधिकारसम्बन्धी राष्ट्रसंघीय घोषणापत्र कार्यन्वयन यायेमा:गु ।

- प्रस्तावित नारायणी व सुनकोशी प्रदेश खारेज यायेमा:गु ।