ठोस सहमति बिना स्वंगू दलया मुँज्या क्वचाल
संविधानसभाया म्याद क्वचायेत स्वन्हु जक ल्यँ दनीगु इलय् स्वंगू प्रमुख राजनीतिक दलत दथुइ थौं जूगु वार्ता छुं ठोस सहमति बिना हे क्वचाःगु दु ।
येँया गोकर्ण रिसोर्टय् च्वंगु माओवादी, कांग्रेस व एमालेया मुँज्याय् राष्ट्रिय सहमतिया सरकार गठन यायेगु विषयलय् दलत सहमति नापसं थ्यंगु धाःगु दु । थौंया मुँज्यां ठोस निष्कर्ष पिकायेमफेवं आः विवाद ज्यंकेगु जिम्मा स्वंगू प्रमुख दलया शीर्ष नेतातय्त बिउगु खः । शीर्ष नेतातय् मुँज्या कन्हय् सुथय् ११ बजे च्वनीगु जूगु दु ।
थौंया मुँज्याय् कांग्रेसं न्ह्यब्वःगु झिगू बुँदे सर्तया बारे सहलह जूगु खः । माओवादीं धाःसा उगु सर्त सैद्धान्तिक रुपं पूवने धुंकूगु धासें आः कार्यतालिका दयेकाः न्ह्याः वनेवं व्यवहारिक रुपं नं पूवनीगु जानकारी बिउगु खः ।
मुँज्याय् प्रधानमन्त्री झलनाथ खनाल, माओवादी नायः पुष्पकमल दाहाल 'प्रचण्ड', कांग्रेस सभापति सुशील कोइराला लगायत स्वंगूलिं दलया केन्द्रीय स्तरया नेतातय् नं ब्वति दुगु खः ।
News Location:
