थौं नं संसदय् विपक्षीतय् अवरोध
नेपाली कांग्रेस लगायत विपक्षी दलतय्सं संविधान संशोधन विधेयकया विरोध यासें थौं नं संसद् अवरोध याःगु दु । शान्ति प्रक्रिया लगायतया विषयलय् राष्ट्रिय सहमति मजुइकवं संविधान संशोधन प्रक्रिया न्ह्याकेमबीगु अडान कयाच्वंगु विपक्षी दलतय्सं थौं नं संसद मुँज्याय् अवरोध याःगु खः ।
प्रतिपक्षी कांग्रेस, संयुक्त मधेशी मोर्चा आवद्ध स्वंगू दल, राप्रपा, राजपा लगायत दलतय्सं आइतवाः निसें लगातार संसदय् अवरोध यानाच्वंगु हुनिं आः संविधानसभाया म्याद थप यायेगु संविधान संशोधन प्रस्ताव झन् अन्यौलय् लाःगु खः ।
संसदय् संविधान संशोधन यायेत मुँक्कं ७२घण्टा आवश्यक जू । तर जेठ १४ गते तकया न्हि स्वयेगु खःसा संसदया मेगू मुँज्या च्वनेगु इलय् ७२ घण्टा स्वयां म्हो जक ई ल्यँ दइ । उकिं आः संसद कार्यसञ्चान नियमावली सम्बन्धी छुं प्रावधान निलम्बन मयायेकं जेठ १४ न्ह्यः संविधान संशोधन यायेफइगु सम्भावना मदु ।
