राष्ट्रिय सहमतिया निंतिं एमालेया स्वंगू विकल्प
येँ (सन्ध्या टाइम्स)/सत्तारुढ पार्टी एमालें राष्ट्रिय सहमतिया निंतिं स्वंगू विकल्प न्ह्यःने हःगु दु ।
एमालेया म्हिगः क्वचाःगु केन्द्रीय कमिटीया बैठकं राष्ट्रिय सहमतिया नितिं राष्ट्रिय सरकार गठन व नेतृत्वया विषयय् स्वंगू विकल्प सहितया प्रस्ताव न्ह्यःने तयाः कांग्रेस व माओवादीलिसे सहलह ब्याकेगु निर्णय याःगु दु।
एमालेया स्वंगू प्रस्तावय् क) वर्तमान सरकारय् हे कांग्रेस नापं मेमेगु दलत दुथ्याकेगु निंतिं लँपु हाकनं खुल्ला यायेगु, ख) सरकारया नेतृत्व पालंपाः यायेगु कथं झलनाथ खनालयात हे आः निला ति प्रधानमन्त्री दयेकाः अनं लिपा संविधान जारी मजूतलेया निंतिं छम्ह अले संविधान जारी जुइ धुंकाः मेम्हेसित प्रधानमन्त्री यायेगु कथं कांग्रेसलिसे नं सहमति याकेगु, ग) आः हे राष्ट्रिय सहमति जुल धाःसा प्रधानमन्त्री झलनाथ खनालं राजीनामा बियाः लँपु चायेकेगु खँ दुथ्याः ।
थ्वहे दथुइ एमालेया वरिष्ठ नेता केपी ओलीं प्रम खनाल व माओवादी अध्यक्ष प्रचण्डया दथुइ जूगु न्हय्गू बुँदाया सहमति भंग यायेमाःगु, माओवादी सेनाया ल्वाभः राज्ययात लःल्हायेमाःगु खँ नापं दुथ्याःगु गुंगू बुँदाया फरक मत तयादीगु दु। वय्कःया फरक मतय् कांग्रेसं पेश याःगु ७ बुँदाया प्रस्तावलिसे यक्व ज्वः लाः। उगु फरक मतयात कयाः जेठ १७ गतेया केन्द्रीय बैठकय् सहलह जुइ धाःगु दु ।
कस्मोपोलिटन सिटीया प्रस्ताव लितकाल
कार्यकर्तां विद्रोहया ख्याच्वः बीवं महासचिव इश्वर पोखरेलं पेश याःगु राजधानीयात कस्मोपोलिटन सिटीया रुपय् विकास यायेगु धाःगु प्रस्ताव लित कयादीगु दु। म्हिगःया केन्द्रीय बैठकय् वय्कलं उगु प्रस्ताव लित कयादीगु दु। कस्मोपोलिटन सिटी धइगु संसारया फुक्क हे देशया नागरिकत ल्वाकछ्यानाः विकास याइगु शहर खः। अमेरिकाया न्युयोर्क, वाशिंगटन अज्याःगु सिटी खः। महासचिव ईश्वर पोखरेलं थज्याःगु खँ हे मसीक उगु प्रस्ताव तयादीगु खँ सीदुगु दु। वय्कःयात कस्मोपोलिटन सिटीया सुझाव चाहिं शंकर पोखरेलं बिउगु जुयाच्वन ।
'एमाले यु जे के यायेमजिउ'
एमाले दुने झलनाथ खनाल व केपी-माधव गुटया रुपय् विकास यानाः एमालेयात यु जे के (युनाइटेड झलनाथ-केपी) याये मजिल धकाः म्हिगःया केन्द्रीय कमिटीया बैठकय् १३ म्ह केन्द्रीय दुजःतय्सं ध्यानाकर्षण पौ दर्ता याःगु दु। पार्टीया मध्यमार्गी नेता धाःपिं प्रदिप नेपाल, मुकन्द न्यौपाने, केशव बडाल, राजेन्द्र पाण्डे, काशिनाथ अधिकारी, प्रदिप ज्ञवाली नापं झिंस्वम्ह नेतातय्सं उगु पती हस्तक्षर यानातःगु दु ।
