'भत्ता मकासे म्याद थपे याये नु'

येँ (सन्ध्या टाइम्स)/माओवादी अध्यक्ष प्रचण्डं भत्ता मकासे संविधानसभाया म्याद थपे याये नु धकाः प्रस्ताव तयादीगु दु। थुगुसी अन्तिम पटक म्याद थपे यायेगु व थ्व दछि भत्ता मकासे ज्या यायेगु प्रस्ताव वय्कलं तयादीगु खः। थौ सुथय् येँय् छगू ज्याझ्वलय् न्ववासें वय्कलं उगु प्रस्ताव तयादीगु खः। वय्कलं धयादिल, 'जिं आः थपे यायेगु संविधानसभाया म्याद अन्तिम जुइमाः धाये अले भत्ता मकायेगु प्रतिबद्धता प्वंकेगु प्रस्ताव तयाच्वना।' शान्ति प्रक्रियाय् यक्व हे प्रगति जूगु व संविधानसभां नं यक्व हे ज्या यायेधुंकूगु दु धासें वय्कलं शान्ति प्रक्रिया बारे माओवादीं यक्व हे महत्वपूर्ण निर्णय यायेधुंकूगु व सेना समायोजन नापं पुनर्स्थापनाया सम्बन्धय् नं विशेष समितिया आः जुइगु बैठकय् समायोजन व पुनर्स्थापनया कार्ययोजना वइगु जानकारी बियादिल ।