'निर्वाणया त्वाथः' विमोचन
यल (सन्ध्या टाइम्स)/बौद्ध च्वमि लोकबहादुर शाक्यं च्वयादीगु थीथी च्वसु मुना सफू 'निर्वाणया त्वाथः' भिक्षु कोण्डन्यं विमोचन यानाबिज्यात। यल पुचःया ग्वसालय् पुनमाया शाक्यया सभापतित्वय् नकतिनि जूगु छगू ज्याझ्वःया दथुइ उगु सफू विमोचन जूगु खः ।
ज्याझ्वलय् न्ववासें च्वमि शाक्यं बुद्ध धर्मया मौलिक सिद्धान्त, शील समाधि, प्रज्ञा थुइकाः चर्या यानाः निर्वाणया लँय् वनेगु हे सफूया मनसाय खः धयादिल ।
भिक्षु कोण्डन्यं बुद्धया सन्देश ध्यानया माध्यमं बोध यानाः दुग्यंक चर्चा याये फतकि निर्वाणया लँपुइ न्ह्यज्याये फइगु सफूया मनसाय स्पष्ट यानाबिज्यात। नेपालभाषा परिषद्या नायः फणीन्द्ररत्न बज्राचार्यं च्वमि शाक्य समाजय् खने दयाच्वंगु विकृतिलिसे मग्यासे च्वयाः नं ल्वहंहिति हाःथें निरन्तर कुतः यानाच्वंम्ह च्वमि खः धयादिल। हिमाली आदिवासी महासंघया अध्यक्ष सकुन शेरचनं बुद्धया जन्म भूमिइ शान्ति जुइमाल, धर्म निरपेक्ष राज्य कायम जुइमाल, जातपात, लिङ्ग, वर्ण, वर्ग मपाकुसे बौद्धत छधी जुइमाल धयादिल ।
सफूया सम्पादक लाभरत्न तुलाधरं विसंगति व आडम्बरं युक्त जीवन तापाका छ्वयेत जोखिम मोले यायेत नं तत्पर जुयाच्वनेमाः धइगु च्वमिया धारणा खः धयादिल।
ज्याझ्वलय् भिक्षु कोण्डन्य, फणीन्द्ररत्न बज्राचार्य, कुलधर्मरत्न तुलाधर, नारायणबहादुर गुरुङ्ग, सकुन शेरचन, लाभरत्न तुलाधर, धर्ममान तुलाधर, धम्मसाकच्छापिंत दोसल्लां न्ययेकाः हंगु खः ।
