नगदेशय् बुद्ध जयन्ती
ख्वप (सन्ध्या टाइम्स)/नगदेश बौद्ध पुचः व बौद्ध ल्याय्म्ह पुचः नगदेशया मंकाः ग्वसालय् २५५५ क्वःगु बुद्ध जयन्ती तःजिक बुद्ध पुजा यासें न्यायेकल ।
ज्याझ्वलय् न्ववासें केन्द्रीय दायक परिषद्या अध्यक्ष बखतबहादुर चित्रकारं राष्ट्रिय जनगणनाय् धर्म व जातीय पहिचानयात विशेष बः बीमाःगु खँ कनादिल। डा. सानुभाई डंगोलं आर्यअष्टाङ्गिक मार्गया बारे चर्चा यानादिल। ज्यापु महागुथिया नायः विपिन्द्र महर्जनं जनजातिइ बौद्ध जागरण वयाच्वंगु खँ कनादिल। नगदेश बौद्ध पुचःया छ्याञ्जे कृष्ण कुमार प्रजापतिं भगवान बुद्धया जीवनी खने दुगु त्रिवेणी संयोग व बुद्धजयन्ती हनेगु चलन बारे ध्वाथुइकादिसें 'भाषा व धर्म' या विषयय् सकल नेपाःमि संवेदनशील जुइमाःगु खँय् बः बियादिल ।
नगदेश बौद्ध पुचःया नायः न्हुछेकुमार सिंकेमनया सभापतित्वय् न्ह्याःगु उगु ज्याझ्वलय् बौद्ध ल्याय्म्ह पुचः नगदेशया नायः शिवभक्त मेजुं लसकुस यानादीगु खः।
ज्याझ्वःया लिपांगु ब्वय् मंकाः पूण्यदानया ज्याझ्वः नं जूगु खः। अथे हे बाजं थानाः, ज्ञानमाला भजन हालाः गौतम बुद्धया ढलोटया मूर्ति खतय् तयाः देय् चाःहीकेगु ज्या नं जूगु खः ।
