भत्ता मकायेगु घोषणा यानाः लिप्पांगु खुसिइ म्याद थप : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' राजनीतिक दलतय्सं संविधानसभाया मुँज्यां भत्ता मकायेगु घोषणा यानाः लिप्पांगु खुसिइ म्याद थप यायेमाःगु प्रस्ताव यानादीगु दु ।
स्वंगू दलत दथुइ गोकर्ण रिसोर्टय् जुइगु मुँज्या न्ह्यः छगू सार्वजनिक ज्याझ्वलय् वय्कलं भत्ता मकायेगु घोषणा व नेपाली जनतानाप क्षमायाचना यानाः संविधानसभाया म्याद थप यायेमाःगु धयादिल । वय्कलं थुगु प्रस्ताव स्वंगू दलतया शीर्ष नेतातय् मुँज्याय् तयेगु जानकारी नं बियादिल ।
एबीसी टेलिभिजन व नेपाल एफएमं बुधवाः प्रमुख दलया शीर्ष नेतातय् ब्वतिइ याःगु साक्षातकार ज्याझ्वलय् प्रचण्डं संविधानसभाया म्याद थप यायेगु इलय् आः लिप्पांगु खुसिइ धकाः च्वयेमाःगु धयादिल । वय्कलं यक्व विषयलय् संविधानसभां सहमति यायेधुंकूगुलिं आः लिप्पांगु खुसिइ म्याद थप यायेगु इलय् पूर्णरुपं संविधान निर्माण जुइगु दावी यानादिल ।
संविधानसभां छुं नं प्रगति मयागु धकाः वयाच्वंगु बुखँ फ्यगं जूगु धयादिसें आः तक यक्व महत्वपूर्ण व संवेदनशील मुद्दाय् सहमति यायेधुंकूगु जानकारी नं वय्कलं बियादिल ।
लोकतन्त्र व संसदीय व्यवस्थाय् विश्वास याइगु नेपाली कांग्रेसं संविधानसभाया म्याद थप यायेत ग्वाहालि मयाइगु खँय् थःम्ह विश्वास यायेमफइगु धयादिसें वय्कलं छन्हु-निन्हुया दुने हे सहमति जुइगु विश्वास प्वंकादिल ।
