संविधानसभा जःखः निषेधित क्षेत्र धर्ना च्वंपिं पूर्व सांसदत गिरफ्तार
येँ (सन्ध्या टाइम्स)/न्हूगु संविधानया माग यानाः संविधानसभा भवन पिने धर्ना च्वंपिं २५ म्ह पुलांपिं सांसद्तय्त प्रहरीं ज्वना यंकूगु दु। न्हूबानेश्वरया संविधानसभा भवनया पश्चिम लागाय् रिले अनसन च्वनाच्वंपिं पुलांपिं सांसद्तय्त ज्वनाः हनुमानथान देगः लागाय् यंकाः त्वःताछ्वःगु खः। उमित गाडीइ तया यंकूगु दु ।
उकथं हे वहे लागाय् धर्ना च्वनाच्वंपिं मिसापिनि दवाव समूहया दुजःतय्त नं प्रहरीं ज्वना यंकूगु दु। धर्ना च्वं वःपिं मिसापिं कार्यकर्तातय्त प्रहरीं लाठीचार्ज यानाः ज्वना यंकूगु खः ।
येँया सीडीओं आः संविधानसभा जःखः लागायात निषेधित क्षेत्र घोषणा याःगु दु। तसकं संवेदनशील लागा जूगुलिं अन धर्ना, विरोध जुलुस छुं नं याये मदु कथं निषेधित क्षेत्र घोषणा याःगु खः। संविधानसभा भवनं हनुमानथानपाखे ५० मिटर, पश्चिम पःखाःया अन्तिम विन्दु, अरनिको राजमार्गपाखे पःखाःया अन्तिम विन्दु तक व शंखमूल वनेगु लँ तक निषेधित क्षत्र याःगु दु ।
