फोरमया माग बारे प्यंगू दल दथुइ सहलह
एमाले नेतृत्वया सरकार गठन यायेगु कुतः यानाच्वंगु दलत दथुइ फोरमया मागयात सम्बोधन यानाः सरकारय् ब्वति याकेगु निर्णय जूगु दु ।
शनिवाः एमाले संसदीय दलया ज्याकूथी च्वंगू प्यंगू दलया नेतातय्सं फोरमं पितब्यूगु निर्णयया बारे सहलह यानाः निष्कर्ष पिकाःगु दु । फोरमं थःगु हे नेतृत्वय् न्हूगु सरकार गठन यायेत कुतः यायेगु व अथे मजूसाः सरकार नाप जूगु सहमति कार्यन्वयन यायेत प्रतिबद्धता प्वंकीगु दलयात सरकार गठन यायेत थःगु पार्टी सरकार पिने च्वनाः हे समर्थन यायेगु निर्णय याःगु खः ।
कांग्रेस, एमाले, तराई-मधेश लोकतान्त्रि पार्टी व सद्भावना पार्टी दथुइ जूगु सहलहलय् फोरमं न्ह्यब्वःगु मागयात सहमतिया आधारय् सम्बोधन यायेगु निष्कर्ष पिकाःगु खँ कांग्रेस उपसभापति रामचन्द्र पौडेलं जानकारी बियादिल । वयेकलं फोरमया माग सम्बोधन यानाः सरकारय् दुथ्याकेगु निर्णय जूगु धयादिल ।
अथेहे, एमाले सचिव शंकर पोखरेलं एमालेया पक्षय् बहुमत गाय्धुंकूगु धासें सोमवाः तक सभामुखयात बहुमतया हस्ताक्षर लःल्हाइगु खँ कनादिल । नापं वयेकलं बैठकं फोरमया मागया खँय् फोरम नाप हे च्वनाः सहलह यायेगु निष्कर्ष पिकाःगु खँ धयादिल ।
