एमालेय् विद्रोह यायेगु कार्यकर्तातय् ख्याच्वः
येँ (सन्ध्या टाइम्स)/एमालेया केन्द्रीय ज्याकू बल्खुइ म्हिगः धर्ना च्वं वंपिं पार्टीया आदिवासी जनजातिया कार्यकर्तातय्सं यदि महासचिव ईश्वरं नकतिनि पार्टीइ पेश याःगु प्रतिवेदन कथं ज्या जुल धाःसा थःपिंसं पार्टी दुने विद्रोह तक नं याये फइगु ख्याच्वः बिउगु दु ।
महासचिव पोखरेलं नकतिनि पेश याःगु प्रतिवेदनय् संघीयताया सन्दर्भय् राजधानी नापं महत्वपूर्णगु शहरयात स्वायत्त कस्मोपोलिटन सिटीया रुपय् विकास याये फइगु सम्भावना दु धकाः न्ह्यथनातःगु दु। यदि थ्व अवधारणा कथं संघीय व्यवस्था लागू यात धाःसा नेवाः स्वायत्त प्रदेशयात तःधंगु घात लाइ धासें नेपाः लोकतान्त्रिक नेवाः संघया नायः सानुराजा शाक्यं उकथं ख्याच्वः बियादीगु खः। संघीयता विरोधी उगु अवधारणायात नेवाः लगायत मेपिं जनजाति कार्यकर्तातय्सं नं स्वीकार याये फइ मखु धकाः साथ बिउगु खः ।
