बन्दं सामान्य लिच्वः
येँ (सन्ध्या टाइम्स)/मातृका यादवया माओवादीं आह्वान याःगु थौंया नेपाल बन्द ज्याझ्वलं स्वनिगःया जनजीवन सामान्य प्रभावित जूगु। थन रुटया गाडी खास हे चले मजूसां निजी गाड व मोटरसाइकल धाःसा चले जू। येँय् छम्ह बन्दकर्तायात ज्वना यंकूगु दुसा म्हिगः बहनी २१ म्ह कार्यकर्तात प्रहरीं ज्वंगु खः। तराईया धनुषा, महोत्तरी, सिरहा, सप्तरी, रुपन्देही, सुनसरी जिल्लाय् बन्दया यक्व हे लिच्वः लाःगु दु। सिराहा व धनुषाय् बन्द आह्वानकर्तातय्सं २५ गः गाडी तोडफोड याना बिउगु दु। २८ सूत्रीय माग पूरा यायेमाःगु माग यासें मातृकाया माओवादीं थौं बन्द आह्वान याःगु खः ।
थ्व हे दथुइ बन्द ज्याझ्वःया विरोध यासें देय्या पर्यटन ब्यवसायीतय्सं येँय् मोटरसाईकल र्याली पिकाःगु दु। पर्यटन ब्यवसायीतय्गु हे नेतृत्वय् पिकाःगु उगु र्याली येँया थीथी थाय् चाःहिउगु खः। र्यालीइ द्वछिगलं मल्याक मोटरसाइकल दुथ्याःगु खः। र्यालीइ पर्यटन व्यवसायी, उद्यमी, व्यापारी व स्वतस्फूर्त रुपं सर्वसाधारणं नं ब्वति काःगु खः। राष्ट्रिय ध्वाँय् ब्वयेकाः 'बन्द मखु संविधान बिउ, बन्द सदांया निंतिं बन्द याये नु' धइगु नारा थ्वयेकाः उगु र्याली पिहां वःगु खः ।
