भैरव रिसालयात वरिष्ठ पत्रकारिता सम्मान
ख्व प(सन्ध्या टाइम्स)/नेपाल पत्रकार महासंघ ख्वप जिल्ला शाखां थन छगू ज्याझ्वःया दथुइ वरिष्ठ पत्रकार भैरव रिसालयात वरिष्ठ पत्रकारिता सम्मान लःल्हासें हन। नेपाल पत्रकार महासंघया पुलांम्ह सभापति हरिहर विरहीं वय्कःयात झिद्वः तका दां, दोसल्ला व हना पौ देछासें हनेज्या यानादीगु खः ।
नेपाल पत्रकार महासंघ ख्वप जिल्ला शाखां ग्वसाः ग्वःगु न्यान्हुयंकंया खोज पत्रकारिता तालिमया समापन समारोहय् वय्कःयात नं हनेज्या याःगु खः। ज्याझ्वलय् सम्मानित व्यक्तित्व भैरव रिसालं पत्रकारिता शुरु जूगु न्हिनिसें हे सुखमय जीवन त्वःतेधुंकूगु तायेकेमाःगु खँ न्ह्यथँसें पत्रकारत थःत वइगु अनेक कथंया धम्की, लोभ व लालच खनाः प्रभावित जुइ मजिउ धयादिल ।
नेपाल पत्रकार महासंघ ख्वप जिल्ला अध्यक्ष नारायणसुन्दर किलम्बुया सभापतित्वय् जूगु तालिम समापन ज्याझ्वलय् शाखाया सल्लाहकार कवीर राणायात नं हनेज्या याःगु खः। समापन ज्याझ्वःया मूपाहां हरिहर विरहीं पत्रकारिता छगू सामाजिक रुपान्तरणया माध्यम जुइमाःगु खँ कनादिल। महासंघया केन्द्रीय सचिव जगत नेपाल, स्तम्भकार लोकेश ढकाल, महासंघया येँ जिल्ला अध्यक्ष गोविन्द चौलागाईं, दिलीप थापामगर, प्रशिक्षक हरिबहादुर श्रेष्ठपिंसं नं न्यान्हुया तालिमया महत्व व खोज पत्रकारिता बारे थीथी खँ कुलादीगु खः। तालिमय् धर्मेन्द्र झा, केदार कोइराला, मोहन मैनालीपिंसं प्रशिक्षण बियादीगु खः ।
