गतिरोध चीकेत माओवादी-कांग्रेसया कार्यदल
संविधानसभाया म्याद क्वचायेत छुं दिं जक ल्यँ दुगु इलय् नं राजनीतिक दलत दथुइ सहमति जुइमफयाच्वंगु इलय् निगू तःधंगु पार्टी एनेकपा (माओवादी) व नेपाली कांग्रेसया नेतात दुथ्यागु छगू कार्यदल नीस्वंगु दु ।
माओवादी व कांग्रेसया थौं संविधानसभा भवनय् जूगु मुँज्याय् निगूलिं दलया निम्ह-निम्ह नेतात दुथ्याःगु कार्यदल गठन याःगु खः । कार्यदलय् माओवादीया पाखें न्वकु डा. बाबुराम भट्टराई व वर्षमान पुन 'अनन्त' दुसाः कांग्रसया पाखें डा. रामशरण महत व डा. मिनेन्द्र रिजाल दु ।
थौंया मुँज्याय् निगूलिं दलं थःथःगु अडना यथावत तयेवं छुं ठोस सहमति बिना हे मुँज्या क्वचाःगु खः । माओवादीं संविधानसभाया म्याद थपया निंतिं कांग्रेसयात इनाप याःगु खःसा कांग्रेसं थःपिंसं न्ह्यब्वःगु झिगू बुँदे माग सम्बोधन मजुइकं संविधानसभाया म्याद थप यायेमफइगु लिसः बिउगु खः ।
मुँज्याय् माओवादीपाखें नायः पुष्पकमल दाहाल 'प्रचण्ड', न्वकु डा. बाबुराम भट्टराई व नारायणकाजी श्रेष्ठ 'प्रकाश'या उपस्थिति दुगु खःसा कांग्रेसपाखें सभापति सुशील कोइराला, उपसभापति रामचन्द्र पौडेल, महामन्त्री कृष्ण सिटोला व विमलेन्द्र निधीया ब्वति दुगु खः ।
News Location:
