धर्नाय् च्वनाच्वंपिं पूर्व सांसदतय्त ज्वन
संविधानसभा भवन पिने धर्नाय् च्वनाच्वंपिं पूर्व सांसदतय्त प्रहरीं ज्वना त्वःतगु दु । जिल्ला प्रशासन ज्याकू येँ नं संविधानसभा जःखया क्षेत्रय् निषेधित क्षेत्र घोषणा याःगु थासय् धर्ना च्वंगु धासें प्रहरीं इमित मंगलवा: सुथय् ज्वंगु खः । प्रहरीं निषेधित क्षेत्रय् धर्ना मच्वनेत याःगु इनापयात बेवास्ता यासं धर्नाय् च्वंगुलिं पूर्व सांसदतय्त नियन्त्रणय् कायेमाःगु खँ धाःगु दु । स्वम्ह मिसा नापं नीन्याम्ह पूर्व सासंदतय्त प्रहरीं नियन्त्रणय् कयाः हनुमानथान क्षेत्रय् यंकाः त्वःतुगु खः ।
उखे शान्ति व संविधानया निंतिं धर्नाय् च्वनाच्वंपिं मिसा अधिकारकर्मीतय्त नं प्रहरीं ज्वनायंकूगु दु । निषेधित क्षेत्रय् धर्ना ब्यूगु धासें प्रहरीं पीन्याम्ह धर्नाकारीतय्त ज्वनायंकूगु ख: । प्रहरीं ज्वनायंकूपिंत न्हू बानेश्वरस्थित प्रहरी ज्याकूथीइ तयातःगु दु । नियन्त्रणय् काये न्ह्यः प्रहरीं धर्नाकारीतय्त लाठीचार्ज तकं याःगु दु । लाठीचार्जय् लानाः नीन्याम्ह धर्नाकारीत घाःपाः जूगु दु ।
