एमाले खुलाया निंतिं जक संविधानसभाया म्याद थप यायेगु पक्षय्
नेकपा (एमाले)या पोलिटब्यूरो मुँज्यां संविधानसभाया म्याद थप यायेगु प्रस्ताव पारित याःगु दु । सोमवाः च्वंगु पोलिटब्यूरो मुँज्यां शान्ति प्रक्रियाया सुनिश्चितता व संविधान निर्माणया स्पष्ट आधार तयार जूसाः संविधासभाया म्याद खुलाया निंतिं थप यायेगु प्रस्ताव पारित याःगु खः ।
एमालें शान्ति प्रक्रियाया सनिश्चितता यायेत जेठ १४ गते दुने हे राजनीतिक दलत दथुइ गम्भीर परामर्श यानाः राष्ट्रिय सहमतिया सरकारया आधार तयार यायेगु प्रस्ताव नं पारित याःगु दु । राष्ट्रिय सहमतिया निंतिं फुक्कं मार्ग प्रशस्त यायेत एमाले तयार जूगु खँ पारित प्रस्तावय् न्ह्यथनातःगु दु ।
अथेहे सेना मातहत महानिर्देशनालय गठन यानाः मिश्रित सुरक्षा बल गठन यायेगु सेनाया प्रस्ताव स्वीकृत यासें अप्वले न्याद्वः लडाकु जक समायोजन यायेमाःगु लडाकु समायोजन सम्बन्धी प्रस्ताव नं पारित याःगु दु । पार्टी मूछ्याञ्जे इश्वर पोखरेलं न्ह्यब्वयादीगु ९ हप्ताया सेना समायोजन व संविधान निर्माण सम्बन्धी कार्यतालिका नं पोलिटब्यूरो मुँज्यां अनुमोदन याःगु दु ।
तर संविधान निर्माण सम्बन्धी विषयलय् धाःसा राष्ट्रिय सहमति आवश्यक जूगु धासें थुकिया बारे कन्हय् निसें न्ह्याइगु केन्द्रीय समितिया मुँज्याय् सहलह यायेगु निर्णय याःगु दु । संविधान निर्माण सम्बन्धी शासकीय स्वरुप, निर्वाचन प्रणाली व संघीयता बाहेक मेगू फुक्कं प्रस्ताव धा:सा पोलिटब्यूरो मुँज्याय् सहलह लिपा पारित याःगु खः ।
News Location:
