माओवादी, कांग्रेस व एमालेया ज्याकुथी जनजातिपाखें धर्ना
येँ (सन्ध्या टाइम्स)/जातीय पहिचान सहितया स्वायत्त प्रदेश सहितया राज्य पुनर्संरचना यायेमाःगु, संविधान निर्माण यायेमाःगु लगायतया माग यासें नेपाःया आदिवासी जनजातितय्सं थौं संविधानसभाया प्रमुख दल एकीकृत माओवादी, नेपाली कांग्रेस व एमालेया केन्द्रीय ज्याकुथी धर्ना च्वनेगु ज्याझ्वः तयातःगु दु ।
आदिवासी जनजाति संयुक्त संघर्ष समितिया आह्वानय् थौं माओवादीया जातीय संगठन आदिवासी जातीय क्षेत्रीय महासंघया नेतृत्वय् माओवादीया हे केन्द्रीय ज्याकू पेरिस डाँडाय्, कांग्रेसया जातीय संगठन नेपाल आदिवासी जनजाति संघया नेतृत्वय् कांग्रेसया केन्द्रीय ज्याकू सानेपाय् व एमालेया जातीय संगठन नेपाल लोकतान्त्रिक आदिवासी जनजाति महासंघया नेतृत्वय् एमालेया केन्द्रीय ज्याकू बल्खुइ धर्ना च्वनेगु ज्याझ्वः तयातःगु दु।उगु धर्ना ज्याझ्वलय् आदिवासी जनजातिया मेमेगु संगठनया नेता कार्यकर्तात नं उपस्थित जुइ धाःगु दु। स्वंगुलिं पार्टीया केन्द्रीय ज्याकुथी धर्ना च्वनेधुंकाः छगू हे कथंया ब्यहोरा दुगु आदिवासी जनजाति संयुक्त संघर्ष समितिं तयार याःगु ज्ञापन पौ तकं शीर्ष नेतातय्त लःल्हायेगु ज्याझ्वः तयातःगु दु ।
अथे हे जेठ १२ गते आदिवासी जनजातितय्गु शक्ति प्रदर्शन नापं संविधानसभा घेराउ ज्याझ्वः तःजिक यायेगु निंतिं स्वनिगः नापं स्वनिगः जःखःया आदिवासी जनजातिया नेता कार्यकर्तात येँय् वइ धाःगु दु ।
