क्षेत्री संगठनतय् दथुइ अस्तित्वया ल्वापु
येँ (सन्ध्या टाइम्स)/थःपिंत नं आदिवासीया धलखय् दुथ्याकेमाः धइगु माग यासें म्हिगः स्वनिगः बन्द याःपिं क्षत्रीतय्सं दयेकातःगु थीथी संगठन दथुइ अस्तित्वया ल्वापु शुरु जूगु दु।
थवंथवय् हे ल्वापु जुयाच्वंगु कारणं म्हिगः सरकारलिसे वार्ता यानाः सहमति जूसां मेगु पक्षं उकियात स्वीकार याये मखु धासें थौं हे न्हूगु संघर्षया ज्याझ्वः घोषणा यायेगु ख्याच्वः बिउगु दु।
म्हिगः सरकारं क्षेत्री समाज नेपाल व क्षेत्री समाज राष्ट्रिय महासंघंया प्रतिनिधितलिसे वार्ता याःगु खःसा उखे महासंघया हे अध्यक्ष कालिदास बहादुर राउतं थःपिनि प्रतिनिधिं सरकारलिसे वार्ता याःगु हे मदु धयादीगु दु। अथे हे राष्ट्रिय आन्दोलन परिचालन समितिया अध्यक्ष कुमार बहादुर थापां वार्ताया खँ थःपिंसं मसिउ धासें अज्याःगु वार्ताया खँयात स्वीकार यायेगु मखु धकाः मेगु आन्दोलन घोषणा यायेत्यंगु दु ।
