फोरम हानं तज्यात / गुप्तां फोरम गणतान्त्रिक पार्टी दर्ता

उपप्रधानमन्त्री उपेन्द्र यादवं नेतृत्व यानाच्वंगु मधेशी जनअधिकार फोरमं हानं तज्याःगु दु । सरकारयात समर्थन यायेगु वा मयायेगु विषयलय् हे कन्द्रीत जुयाः न्हापांगु खुसिइ तज्याःगु फोरम हानं उगु हे विषयात कयाः तज्याःगु दु ।

फोरमया सहअध्यक्ष जयप्राशप्रसाद गुप्ताया नेतृत्वय् पार्टी विभाजन जूगु दु । गुप्ता पुचलं झिंस्वम्ह सभासद्तय् ल्हाःचिं सहित सभामुख सुभाषचन्द्र नेम्वाङया कार्यकक्षय् वनाः मधेशी जनअधिकार फोरम गणतान्त्रिक नांया पार्टी दर्ता याःगु दु ।

वर्तमान झलनाथ खनाल नेतृत्वया सरकारयात समर्थन यायेगु वा मयायेगु धइगु विषयलय् पार्टी दुने कच्वं जुयाच्वंगु इलय् असन्तुष्ट गुप्ता पुचलं न्हूगु पार्टी नीस्वंगु खः । झिंस्वम्ह सभासद्त सहित नीस्वंगु गुप्ता नेतृत्वया न्हूगु पार्टी संविधानसभाय् निगूगु तःधंगु मधेशवादी पार्टी जूगु दु ।

थ्वस्वयां न्ह्यः फोरमं न्हापांगु खुसिइ नीगुम्ह सभासद् सहित पार्टी विभाजन याःगु विजयकुमार गच्छदार नेतृत्वया फोरम लोकतान्त्रिक संविधानसभाय् दकलय् तःधंगु मधेशवादी पार्टी खः । थ्वनापं आः यादव नेतृत्वया फोरमय् मुक्कं गुम्ह जक सभासद् जूगु दु ।

गुप्ता नेतृत्वया फोरम गणतान्त्रिकय् दुथ्यापिं सभासद्त :

१. जयप्राशप्रसाद गुप्ता
२. विश्वानाथ प्रसाद यादव
३. अक्वाल अहमत साह
४. राजवल यादव
५. नन्दन कुमार दत्त
६. सविता देवी यादव
७. राजकिशोर यादव
८. सुरिता कुमारी साह
९. सल्मा खातुन मिकरानी
१०. आत्मराम प्रसाद साह
११. ओमप्रकाश यादव
१२. चन्द्रीका प्रसाद यादव
१३. सन्ध्या देवी