झिगू बुँदे सर्तया बारे कांग्रेसं चिधंगु दलत नाप सहलह
नेपाली कांग्रेसं संविधानसभाया म्याद थपया निंतिं तःगु झिगू बुँदे सर्तया बारे संविधानसभाय् दुथ्याःगु चिधंगु दलतनाप सहलह याःगु दु ।
सिंहदरवारस्थित कांग्रेस संसदीय ज्याकूथी सोमवाः जूगु सहलहलय् चिधंगु दलतय्सं कांग्रेसया सर्त प्रति समर्थन प्वंकूगु दु । इमिसं यथास्थितिइ हे संविधानसभाया म्याद थप यायेमज्यूगु पक्षय् थःपिं नं दुगु जानकारी बिउगु दु ।
कांग्रेसं जेठ १० गते दुने हे माओवादी लडाकुतय् ल्वाभः राज्ययात लःल्हायेमाःगु, लडाकुतय्त मुख्य शिविरय् जक तयेमाःगु, रिग्रुपिङ यायेमाःगु, राष्ट्रिय सहमतिय सरकारया निंतिं प्रधानमन्त्री झलनाथ खनालं राजीनामा बिइमाःगु लगायत सर्त न्ह्यब्वःगु खः ।
मुँज्याय् सरकारं संविधानसभाया म्याद थपया निंतिं संसदय् दर्ता याःगु संविधान संशोधन प्रस्ताव असफल यायेगु विषयलय् नं सहलह जूगु खः । कांग्रेसं उगु प्रस्ताव विफल यायेगु निंतिं ग्वाहालि यायेत चिधंगु दलतय्त इनाप याःगु दु । कांग्रेसं संसदया मुँज्याय् संशोधन प्रस्ताव दर्ता याःसा मुँज्या अवरोध यायेगु ख्याच्वः बियाच्वंगु दु ।
थौंया मुँज्याय् कांग्रेस लगायत संयुक्त लोकतान्त्रिक मधेशी मोर्चा आवद्ध स्वंगू दल, राष्ट्रिय प्रजातन्त्र पार्टी, राष्ट्रिय जनशक्ति पार्टी, नेपाली जनता दललगायत पार्टीया नेतातय् ब्वति दुगु खः ।
News Location:
