ल्याय्म्ह नेतातय् कार्यदल थनिंनिसें सक्रिय
येँ (सन्ध्या टाइम्स)/शान्ति प्रक्रिया, संविधान निर्माण व राष्ट्रिय सहमतिया नितिं आधार तयार याये मूमू स्वंगू राजनीतिक दलया ल्याय्म्ह नेतातय्सं दयेकूगु कार्यदलं थनिंनिसें ज्या न्ह्याकीगु जूगु दु। कार्यदलं राष्ट्रिय सहमतिया मंकाः प्रस्ताव तयार यानाः थःथःगु दलया शीर्ष नेतातय्त लः ल्हायेगु खँ एकीकृत माओवादीया ल्याय्म्ह नेता वर्षमान पुनं कनादीगु दु। म्हिगः जक एकीकृत माओवादी, नेपाली कांग्रेस व एमालेया ल्याय्म्हपिं नेतात जानाः अज्याःगु कार्यदल दयेकेगु ज्या न्ह्याकूगु खः। स्वंगुलिं दलं निम्ह निम्ह नेतात च्वंगु उगु कार्यदलय् एकीकृत माओवादीपाखें वर्षमान पुन व जनार्दन शर्मा, एमालेपाखें विना विभागीय मन्त्री घनश्याम भुषाल व योगेश भट्टराई अले कांग्रेसपाखें चन्द्र भण्डारी व एनपी साउद दुजः कथं च्वनादीगु खः ।
प्रधानमन्त्री नापं एमाले अध्यक्ष झलनाथ खनाल व एकीकृत माओवादी अध्यक्ष प्रचण्ड दथुइ कन्हय् थौं सहलह जूगु दु। कन्हय् च्वनीगु स्वंगू दलया शीर्ष नेतातय्गु बैठकय् सेना समायोजनया मोडालिटी बारे जुइगु सहलहया पूर्व तयारी कथं वय्कःपिनि दथुइ थ्व बैठक च्वंगु खः। थौं प्रधानमन्त्री खनाल व अध्यक्ष प्रचण्ड दथुइ जूगु भेटवार्तां हे कन्हय् स्वंगू दलया शीर्ष नेतातय् बैठक च्वनेगु निर्णय याःगु खः। सरकारं सेना समायोजन नापं संविधान निर्माणया सवालय् थःपिनि कार्यतालिका तयार यानाः म्हिगः जक सार्वजनिक याःगु खः ।
