संशोधन विधेयक संसदय् पेस याइगु
येँ (सन्ध्या टाइम्स)/संविधानसभाया म्याद दच्छि थपे यायेगु नितिं सरकारपाखें दर्ता याःगु अन्तरिम संविधान संशोधन विधेयक थौं संसदय् पेस यायेत्यंगु दु।
थौंया बैठकय् राप्रपा नेपालया चन्द्रबहादुर गुरुङं दर्ता याःगु विरोधया सूचनाय् मतदान यानाः थुकिया बारे निर्णय याइ।
उगु सूचनायात साधारण बहुमतं टुंगे याइ। छुं जुयाः विरोधया प्रस्ताव पारित जुल धाःसा संशोधन प्रस्ताव न्ह्यज्याके दइ मखु। संशोधन विधयेक हे समाप्त जुइ। उगु प्रस्ताव विफल जुइवं संशोधन प्रस्तावया ज्या न्ह्याइ। सभामुख सुवास नेम्वाङं प्रमुख दलतलिसे सहलह ब्याकाः जेठ १२ गते हे संसदय् विधेयक बारे मतदान यायेगु कार्यसूची तयार यायेधुंकूगु खँ संसद सचिवालयं धाःगु दु ।
