बन्द अवज्ञा यासें मोटरसाईकल र्याली
येँ (सन्ध्या टाइम्स)/थौंया स्वनिगः बन्दया विरोध यासें पर्यटन ब्यवसायीतय्सं येँया थबही लागां थौं न्हिनय् छगू मोटरसाईकल र्याली पिकाःगु दु। र्याली येँया थाय्थासय् चाःहिलाः थबहिली तुं थ्यंकाः कोणसभा यानाः क्वचायेकूगु खः। र्यालीइ पर्यटन ब्यवासायी, उद्यमि, व्यापारी व सर्वसाधारणं ब्वति काःगु खः। द्वःछिगःति मोटरसाइकलं ब्वति काःगु उगु र्याली ४५ मिनेट ति चाःहिउगु खः। र्याली समापनय् न्ववासें नेपाल उद्योग वाणिज्य महासंघया अध्यक्ष सुरज वैद्यं आःया अवस्थाय् नेपाःमितय्त संविधान माःगु दु बन्द मखु धयादिसें पसः, यातायात नापं व्यवसाय संचालन यायेत इनाप यानादिल। पर्यटन व्यवसायीतय्सं थौं बहनी ५ बजे तकया दुने बन्द लित मकाल धाःसा बन्द विरुद्ध सशक्त ज्याझ्वः यायेमाली धकाः ख्याच्वः नं बिउगु दु ।
