जनजातिया प्रदर्शन १२ गते सरे जुल

येँ (सन्ध्या टाइम्स)/जातीय पहिचान सहितया स्वायत्त प्रदेश माग यानाः नेपाःया आदिवासी जनजातितय्सं वइगु जेठ ११ गते याये धयातःगु बृहत् जनप्रदर्शन १२ गते जक याइगु जूगु दु। माओवादीं जनपरिचालन ज्याझ्वः धकाः जेठ १० गते यायेत्यंगु ज्याझ्वः छन्हु लिछ्यानाः ११ गते यायेत्यंगुलिं जनजातितय्सं नं ११ गते याये धयातःगु ज्याझ्वः १२ गते सारे याःगु खः। माओवादीं शान्ति व संविधानया नितिं थीथी थासय् जन परिचालन यायेगु झ्वलय् ११ गते खुल्लामञ्चय् शक्ति प्रदर्शन याये कथं जनपरिचालन यायेत्यंगु दु। आदिवासी जनजाति संयुक्त संघर्ष समितिया थौं सुथय् च्वंगु मुँज्यां १२ गते जक प्रदर्शन यायेगु निर्णय याःगु खँ संयोजन मण्डलया दुजः मल्ल के. सुन्दरं कनादीगु दु। थःथःगु सांस्कृतिक बाजं सहित ब्वति काइगु उगु जुलुस पिकाइ ।