आनन्दकुटीइ बुद्ध जयन्तीया बौद्ध सभा

येँ (सन्ध्या टाइम्स)/२५५५ क्वःगु बुद्धपुन्हि - वैशाख पुन्हिया लसताय् आनन्दकुटी विहार, स्वयम्भुइ थीथी ज्याझ्वःया दथुइ छगू बौद्ध सभा जुल। बुद्ध जयन्ती कुन्हु भगवान् बुद्धया पवित्र अस्थिधातु सर्वसाधारणयात दर्शन याकेगु निंतिं पिकायेगु झ्वलय् पवित्र अस्थिधातु निधान यानातःगु श्रीलंकाचैत्यस्थलंनिसें दर्शनया लागिं दयेकातःगु विशेष मण्डपतक उगु अस्थिधातु मित्रराष्ट्र श्रीलंकाया महामहिम राजदूतया प्रतिनिधिं छ्यनय् तयाः यंकूगु खः ।

अथे हे ज्ञानमाला भजन खलः स्वयम्भूं ज्ञानमाला भजन न्ह्यब्वःगु खःसा वरिष्ठ भिक्षुपिनिगु समुपस्थितिइ मंकाः बुद्धपूजा, धर्मदेशनाया ज्याझ्वः नं न्ह्याकूगु खः। ज्याझ्वलय् भिक्षु संघ, अनगारिकापिंलिसें उपस्थित द्वलंद्वः भक्तजनपिंत क्षीरभोजनया व्यवस्था नं याःगु खः ।

अथे हे बुद्ध जयन्तीया लसताय् हिदान ज्याझ्वः नं जुल। उकी मुक्कं ७७ म्हेसिनं ब्वति काःगु खः। उकुन्हु सनिलय् उपप्रधानमन्त्री भरतमोहन अधिकारीयात मूपाहां दयेकाः बौद्धसभा नं जुल। बुद्ध जयन्ती समारोह समितिया धम्मानुशासक भिक्षु कुमारकाश्यप महास्थवीरया सभापतित्वय् जूगु उगु ज्याझ्वलय् म्यान्मारया राजदूत ऊ थेट ऊ व अखिल नेपाल भिक्षु महासंघया सचिव भिक्षु धम्ममूर्तिं न्ववानादीगु खः। ज्याझ्वलय् समितिया महासचिव संघरत्न शाक्यं लसकुस यानादीगु खःसा उपाध्यक्ष गौतम शाक्यं सुभाय् बियादीगु खः। बुद्ध जयन्ती कुन्हु आनन्दकुटी विहारय् जुइगु क्षीरभोजनयात वंगु छुं दँनिसें सकतां व्यवहारय् ग्वाहालि यानादीम्ह थानकोटया पृथ्वीनारायण मानन्धर, कालिमाटीया मंगलदास मानन्धर व ठमेलया मैंया मानन्धरयात मूपाहां अधिकारीं अभिनन्दन यासें बुद्धमूर्ति लःल्हानादीगु खः ।

बुद्ध जयन्तीयात सभा, समारोह, जात्रा, पर्वया रूपय् जक सीमित मयासे बुद्ध धर्मयात जनजनय् थ्यंकाः सकसिगुं कल्याणया ताः तयाः थुगु समितिं भिक्षु, अनगारिकापिंत थीथी जिल्लाय् धर्मदेशनाया लागि छ्वयेगु यानाच्वंगु दु। अथे हे, मूल समारोह समितिया हैसियतं देशव्यापी बुद्ध जयन्ती तःजिक न्यायेकेगु निंतिं बौद्ध विहार, गुम्बा, संघसंस्थातय्त पम्प्लेट, भ्वंया बौद्ध ध्वाँय्, बुद्धया तस्वीर, बाय्ज लगायतया प्रचार-सामग्रीत निःशुल्क इनेगु ज्या नं यानाच्वंगु दु ।