न्युयोर्कय् मुनया उपस्थितिइ ज्याझ्वः
येँ (सन्ध्या टाइम्स)/२५५५ क्वःगु बुद्ध जयन्ती न्यूयोर्कय् नं तःजिक हन। संयुक्त राष्ट्र संघया महासचिव वानकी मुनयात मूपाहां दयेकाः महासभा कक्षय् बुद्ध जयन्ती न्यायेकूगु खः। सन् २००० निसें दँय्दसं राष्ट्र संघ महासभाया कक्षय् बुद्ध जयन्ती न्यायेकेगु याना वयाच्वंगु दु ।
ज्याझ्वलय् महासचिव मुनं स्वदँ न्ह्यः नेपाः वनाबलय् बुद्धया जन्मस्थान लुम्बिनी नं वनागु खँ लुमंकुसें शान्ति व मानव अधिकार बारे राष्ट्र संघ व बुद्धया सिद्धान्तय् समानता दुगु खँ नं कनादिल ।
ज्याझ्वलय् संयुक्त राष्ट्र संघया निंतिं नेपाःया स्थायी प्रतिनिधि ज्ञानचन्द्र आचार्यं बुद्धया जन्मस्थल लुम्बिनीया संरक्षण व प्रर्वद्धनया निंतिं नेपाल सरकारया तत्परता न्ह्यथनादिल ।
हिदान ज्याझ्वः
खास्ति नेवाः पुचःया ग्वसालय् नं बुद्ध जयन्तीया लसताय् हिज्याझ्वः जुल। ज्याझ्वलय् मुक्कं ११३ म्हेस्यां ब्वति काःगु खःसा ज्याझ्वः राधिका श्रेष्ठया संयोजकत्वय् न्ह्याःगु खः ।
