क्षेत्रीतय् स्वनिगः बन्दं जनजीवन प्रभावित
बन्दया विरोधय् मोटरसाइकल र्याली
खस क्षेत्री एकता समाजं थौं याःगु स्वनिगः बन्दं जनवीवन प्रभावित जूगु दु । खस क्षेत्रीतय्त नं आदिवासीतय् धलखय् दुथ्याकेमाःगु माग यासें समाजं बन्दया आव्हान याःगु खः । बन्दया हुनिं स्वनिगः दुने पसः, कलकारखाना, शिक्षण संस्था आदि बन्द जूगु दु ।
बन्दया झ्वलय् जबर्जस्ती सवारीसाधनय् अवरोध यायेत स्वःपिं आपालं बन्दकर्तातय्त प्रहरीं नियन्त्रणय् काःगु दु । स्वनिगःया गोंगबु, कलंली, त्रिपुरेश्वर, सोह्रखुट्टे, महाराजगञ्ज, रत्नपार्क लगायत क्षेत्रं प्रहरीं स्वसः बन्दकर्तातय्त ज्वनायंकूगु दु ।
उखे पर्यटन व्यवसायीतय्सं बन्दया अवज्ञा यासें मोटरसाइकल र्याली पिथन । ठमेलं न्ह्याःगु र्याली दरवारमार्ग, घण्टाघर, भद्रकाली, न्हूसतक, भोटाहिटी जुयाः हानं ठमेल थ्यंकाः क्वचाःगु खः । 'बन्द मखु संविधान बिउ' धकाः च्वयातःगु प्लेकार्ड ज्वनाः पिहांवःगु र्याली ठमेल थ्यंकाः छगू कोणसभाय् हिउगु खः । कोणसभायात नेपाल उद्योग वाणिज्य महासंघया नायः सुरज वैद्य लगायत सम्बोधन यानादीगु खः ।
