कांग्रेसं २०४६साल लिपा येँय् दकलय् त:धंगु शक्ति प्रदर्शन
नेपाली कांग्रेसं थःगु शक्ति प्रदर्शनया झ्वलय् थौं येँय् छगू विशाल सभा यात । कांग्रेसं थुगु सभायात २०४६साल लिपा थ:पिंसं येँय् या:गु दकलय् त:धंगु आमसभा जूगु दावी या:गु दु । वंगु वैशाख ११ गते निसें कांग्रेसं सुरु याःगु राष्ट्रिय जागरण अभियन अन्तर्गत थौं लिपांगु सभा येँय् याःगु खः । थ्वस्वयां न्ह्य: कांग्रेसं देय्न्यंकया थीथी खुगू सहरय् सभा या:गु ख: । कांग्रेस येँ जिल्ला सभापति भिमसेनदास प्रधानया सभापतित्वय् जूगु ज्याझ्वलय् कांग्रेस सभापति सुशील कोइराला, वरिष्ठ नेता शेरबहादुर देउवा, उपसभापति रामचन्द्र पौडेल, महामन्त्रीत प्रकाशमान सिंह व कृष्ण सिटौला लगायत आपालं नेतातय्सं सम्बोधन याःगु खः ।
सभा सुरु जुइ न्ह्यः येँया थीथी थासं कांग्रेस कायकर्तातय्सं जुलुस पिथना खुल्लामञ्चय् थ्यंकूगु खः । कांग्रेसं येँया कलंकी, कालिमाटी, त्रिपुरेश्वर, बानेश्वर, महाराजगञ्ज, गौशाला लगायत थासं जुलुस पिथंगु खः । सभाय् ब्वति कायेत कांग्रेसं वागमती अञ्चलया फुक्कं क्रियाशील दुज:तय्त अनिवार्य उपस्थित जुइत निर्देशन बिउगु ख: । सभाय् कांग्रेसया स्वनिग:, वागमती अञ्चल लगायत देय्न्यकंया हे कार्यकर्तातय्सं ब्वति का:गु ख: ।
सभाय् सुनां छु धाल?
सुशील कोइराला : राजनीतिक दलत दथुइ छवाःया दुने सहमति मजूसाः देशय् दुर्घटना जुइगु ख्याच्वः । माओवादीं तानाशाही लादे यायेत स्वःसा इमिगु याकन हे पतन जुइगु ।
शेरबहादुर देउवा : सेनाया प्रस्ताव उपयुक्त जूगु माओवादीया धापू सकारात्मक । माओवादीं बहुलवाद माने मयासा इमित विश्वास यायेफइमखु ।
रामचन्द्र पौडेल : माओवादी नेतात थ: हे कार्यकर्तातपाखें असुरक्षित । थ: हे असुरक्षित जुइपिंसं जनताया सुरक्षा व लोकतन्त्रया सुरक्षा गुकथं याइ?
प्रकाशमान सिंह : थ:गु पार्टी दुनेया विद्रोह साम्य यायेमफुगु माओवादीं गुकथं जनविद्रोह याइ? गणतन्त्र व लोकतन्त्र संस्थागत जुइगु संविधान जक कांग्रेसयात मान्य ।
कृष्णप्रसाद सिटौला : माओवादीत जंगलं वःगु ताः ई जुइधुंकूसां अझं इमिगु व्यवहारय् हिउपा मवःगु द्वपं । माओवादी निशस्त्र मजुइकं इमित विश्वास यायेफइमखु ।
चित्रलेखा यादव : प्रचण्ड व झलनाथ खनाल निम्हेसिनं देय्यात निकास बीमफइगुलिं निम्ह नेतात दथुइ जूगु सहमति खारेज जुइमाः ।
गोपालमान श्रेष्ठ : माओवादी व एमाले दथुइ जूगु न्हय्गू बुँदे सहमति खारेज यानाः प्रधानमन्त्री झलनाथ खनालं राजीनाम बीमाः ।
विमलेन्द्र निधि : माओवादीं जनवादी संविधान चाहे जूगुलिं संविधान निर्माणया ज्या पूवनेमफुगु । माओवादीया हे हुनिं शान्ति व संविधान निर्माण प्रक्रिया अवरुद्ध ।
डा. रामशरण महत : हलिंन्यकं हे कम्युनिष्टतन्त्र सखाप जुइधुंकूगुलिं नेपालय् नं जनवादी व्यवस्थाया सम्भावना मदु ।
अर्जुननरसिंह केसी : दच्छिया दुने च्याक्वः जक मुँज्या च्वनीगु संविधानसभाया औचित्य समाप्त जुइधुंकल ।
नरहरि आचार्य : लोकतान्त्रिक संविधानं जक विधिया शासन स्थापित याइगु सम्भावन दुगुलिं अज्याःगु संविधानया निंतिं मेगू जनआन्दोलन आवश्यक ।
डा. प्रकाशशरण महत : प्रचण्ड व झलनाथ खनालं लोकतान्त्रिक संविधान चाहे मजूगु द्वपं । संविधान जारी याये न्ह्यः शान्ति प्रक्रिया क्वचायेकेमाः ।
सुजाता कोइराला : राष्ट्रिय सहमतिया विकल्प मदुगुलिं फुक्कं राजनीतिक दल छथाय् हे च्वनेमाः ।
मनमोहन भट्टराई : नैतिक आदर्श व सैद्धान्तिकताया बलय् कांग्रेस माओवादीनाप ल्वायेत नं तयार ।
निलाम्बर आचार्य : कांग्रेस बिना लोकतान्त्रिक संविधान निर्माण सम्भवना मदु ।
