बन्दकारी ब्रम्हूपाखें एम्बुलेन्स तोडफोड
येँ (सन्ध्या टाइम्स)/संघीय व्यवस्थाया विरोध यासें आन्दोलन याःपिं ब्रम्हूतय्सं थौं विरामी ल्ह्ययेगु एम्बुलेन्स व पत्रिकायात तकं बाँकी मतल ।
थौं बन्दया झ्वलय् लुम्बिनी मेडिकल कलेजया एम्बुलेन्स चले यात धकाः एम्बुलेन्स तोडफोड याःगु खः। इमिसं पाल्पाय् लु. १ च ३२४४ नम्बरया एम्बुलेन्स तोडफोड याःगु दुसा प्रहरीं एम्बुलेन्स तोडफोड याःपिं स्वम्हेसित ज्वंगु दु। ब्रम्हू जातियात नं आदिवासीइ सुचिकृत यायेमाःगु माग यासें ब्राम्हण समाजं थौं पश्चिमाञ्चल बन्द याःगुलिं अनया जनजीवन सुथंनिसें हे प्रभावित जूगु दु। इमिसं जातीय आधारय् राज्यया पुनःसंरचना यायेमजिउ धकाः नं माग याःगु दु। ब्राम्हण समाजया कार्यकर्तातय्सं थौं सुथय् रुपन्देहीया कोटीहवाय् 'नागरिक' व 'रिपब्लिका' न्हिपौ नं च्याका बिल। थःपिनि बन्दया समाचार मच्वः धकाः पत्रिका च्याकूगु खः। अथे हे 'कान्तिपुर' पत्रिकाया भ्वं ज्वनावःगु गाडीइ नं पंगः थंगु दु। बन्दं यानाः गण्डकी, लुम्विनी व धवलागिरी अञ्चलया १६ गू जिल्लाय् थौं सुथंनिसें हे जनजीवन प्रभावित जूगु दु ।
अथे हे आइतवाः व सोमवाः क्षेत्रीतय्सं नं बन्द आह्वान याःगु दु ।
