उर्जा सम्बन्धी सरकारी घोषणा अलपत्र
येँ (सन्ध्या टाइम्स)/देय्न्यंकं थौंकन्हय् कडा रुपं लागू जुयाच्वंगु लोडशेडिंग क्वपालेगु लागिं उप्रधानमन्त्री एवं अर्थमन्त्री भरतमोहन अधिकारीं थनिं निला न्ह्यः तयार यानाः सार्वजनिक याःगु जलस्रोत विकास सम्बन्धी छगू 'घोषणापत्र' थौंकन्हय् अलपत्रय् लानाच्वंगु खँ सीदुगु दु ।
तच्वयाच्वंगु लोडशेडिङ्ग म्हो यायेगु लागिं अल्पकालीन व दीर्घकालीन यानाः थीथी योजनात दुथ्याकाः तयार याःगु उर्जा सम्बन्धी उगु घोषणापत्र उबलय् तसकं चर्चित जूगु खःसां आः धाःसा उर्जा मन्त्रालय दुने अलपत्र अवस्थाय् लानाच्वंगु खँ सूत्रं धाःगु दु ।
भरतमोहन अधिकारीं अर्थमन्त्रीया हैसियतं तयार याःगु उर्जा विकास उम्बन्धी उगु ग्वसाः आः तक मन्त्रिपरिषद्तय् तकं पेश मयाःनि। न उकियात संसदय् हयाः पारित हे याःगु दु। अर्थ मन्त्रालयं तयार याःगु प्रस्ताव खःसां उकियात उर्जा मन्त्रालयं लागू यायेमाःगु खः। तर अर्थं उकियात कयाः उर्जालिसे आः तक छुं कथंया संवाद तकं मयाःनि। उर्जाया अधिकारीतय्सं उगु प्रस्ताव पत्रिकाय् वःगु बाहेक आधिकारिक रुपं थःपिंसं ब्वने तकं मखंनिगु खँ नं धाःगु दु ।
अबलय् मन्त्री अधिकारीं तयार याःगु उगु प्रस्तावय् नीदँया दुने नेपालं प्रशस्त विद्युत उत्पादन यानाः विद्युत निर्यात समेत याये फइगु खँ धयातःगु खः। लिसें अल्पकालीन योजनात हयाः आकिवंनिसें हे लोडशेडिङ्ग म्हो याना यंके फइगु खँत नं दुथ्याका तःगु खः ।
