जनजातितपाखें ११ गतेया नितिं तयारी
येँ (सन्ध्या टाइम्स)/जातीय पहिचान सहितया प्रदेश निर्माण यायेमाःगु नापं थीथी कथंया माग तयाः वृहत् आन्दोलन यायेगु झ्वलय् वइगु ११ गते शक्ति प्रदर्शन नापं संविधानसभा घेराउ ज्याझ्वः ताःलाकेगु नितिं नेपाःया आदिवासी जनजातिय्सं ब्यापक रुपं तयारी यानाच्वंगु दु ।
नेपाल आदिवासी जनजाति संयुक्त संघर्ष समितिं धाः कथं उकुन्हु नेवाःत बसन्तपुरं, तामाङत माइतिघर मण्डलां, मगःत थापाथली लागां, हिमाली जनजातित चाबही लागां व तराईया जनजातित गौशाला लागां थःथःपिनिगु सांस्कृतिक बाजं नापं थानाः जुलुस सहित संविधानसभा घेराउ यायेगु तयारी याःगु दु। अथे हे वइगु ९ गते एकीकृत माओवादी, नेपाली कांग्रेस व एमालेया केन्द्रीय ज्याकुथी उगु पार्टीया हे जातीय मोर्चा, संघ संगठनतपाखें थःथःपिनिगु पार्टीया केन्द्रीय ज्याकुथी धर्ना च्वनाः ज्ञापनपत्र बीगु नितिं नं माःगु कथं तयारी यानाच्वंगु दु ।
