लुम्बिनीइ तःजिक ज्याझ्वः
लुम्बिनी (सन्ध्या टाइम्स)/२५५५ बुद्ध जयन्तीया लसताय् अन्तर्राष्ट्रिय बौद्ध समाजया ग्वसालय् अनिच्च छात्रवृत्ति समाजया संस्थापक अध्यक्ष भिक्षु मैत्री महास्थवीरं लःल्हानाबिज्यात। रुपन्देहीया स्कूलया छात्रातय्त अनिच्च छात्रा छात्रवृत्ति खुगू तगिमंनिसें बीगु यानाच्वंगुली झिगू तगिं थ्यनकि छात्रवृत्ति क्वचाइगु वा अनुत्तिर्ण जुलकि छात्रवृत्ति बन्द जुइगु व्यवस्था यानातःगु दु। प्रतिभाशाली छात्रातय्सं छात्रवृत्तिया निंतिं इनाप याःसा एस.एल.सी. उत्तीर्ण जुइधुंकाः क्याम्पस वा प्लस टू अध्ययनया निंतिं नं बी फइगु खँ नं भिक्षु मैत्री महास्थवीरं कनाबिज्यात। छात्रवृत्ति कथं प्रत्येक छात्रायात १००० तका व स्टेशनरी ज्वलं बिउगु खः ।
अस्ति धातु ब्वज्या : महामायादेवी देगः लागाय् श्रीलंकां हयातःगु निकू बुद्धया अस्ति धातु नं ब्वज्या जुल। थ्व अस्ति धातु न्हापा जेष्ठ पुन्हि कुन्हु प्रदर्शनी यानाच्वंगु जूसां थौंकन्हय् धाःसा बुद्ध जयन्ती कुन्हु ब्वज्या यानाच्वंगु दु ।
बौद्ध न्ह्यसः लिसः कासा : अन्तर्राष्ट्रिय बौद्ध समाजया ग्वसालय् रुपन्देही जिल्लाव्यापी अन्तर माध्यमिक विद्यालय बौद्ध रनिङ्ग शिल्ड न्ह्यसः लिसः कासा लुम्बिनीया अनिच्च हलय् क्वचाल। धेंधेंबल्लाखय् उत्कृष्ट ब्वनेकुथि व ब्वँमिपिंत मूपाहां मनकामना डेभलपमेन्ट बैंकया म्यानेजर गौरव शाक्यं शिल्ड व दां सिरपाः लःल्हानादीगु खः। धेंधेंबल्लाःया ल्यज्या पुचलय् अन्तर्राष्ट्रिय बौद्ध समाजया संस्थापक अध्यक्ष भिक्षु मैत्री व सदस्य सचिव नरेन्द्रकुमार मल्लिक, स्यनामि अरुण मरासिनीपिं च्वनादीगु खः ।
प्रबज्या ज्याझ्वः : बुद्ध जयन्तीया हे लसताय् अमृत हलय् अन्तर्राष्ट्रिय बौद्ध समाजया संस्थापक अध्यक्ष भिक्षु मैत्री महास्थवीरया आचार्यत्वय् व भिक्षु जिनरतन महास्थीवरया उपाध्यत्वय् १२ म्ह मिजं मचातय्त प्रबज्या प्रदान यायेगु ज्या जुल ।
हिदान ज्याझ्वः : बुद्ध जयन्तीया लसताय् अन्तर्राष्ट्रिय बौद्ध समाजया ग्वसालय् छगू हिदान जुल। उगु हिदान ज्याझ्वलय् ३० म्हसिनं ब्वति कयादीगु खः ।
