सैन्य तालिमया प्रावधान मतयेगु सहमति

नेपाःया १८दँ दुपिं प्रत्येक बालिग नागरिकतय्त अनिवार्य सैनिक तालिम बीगु प्रावधान न्हूगु संविधानय् मतयेगु खँय् राजनीतिक दलत दथुइ सहमति जूगु दु ।

संवैधानिक समिति अन्तर्गतया विवाद ज्यंकेत नीस्वंगु उपसमितिया शुक्रवाः सुथय् च्वंगु मुँज्यां अनिवार्य सैनिक तालिम कायेमाःगु संवैधानिक प्रावधान तयेगु माओवादी प्रस्तावयात अस्वीकृत याःगु खः । माओवादीं १८दँ दुपिं फुक्कं नागरिकतय्सं सैन्य तालिम कायेमाःगु प्रावधान न्हूगु संविधानय् दुथ्याकेमाःगु प्रस्ताव तःगु खः ।

थुगु विषयलय् सहमति जुइवं आः मुक्कं नीछगू विषयलय् जक सहमति जुइ ल्यँ दनी । म्हिग च्वंगु मुँज्यां संविधानया नां लगायतया विषयलय् सहमति याःगु खः । थौं मेमेगू विषयलय् नं सहलह यायेगु धकाः क्वःछिनातःगु खःसां कांग्रेसं येँय् जनसभा यायेत्यंगुलिं मुँज्या याकन क्वचायेकूगु खः ।