सेनां न्ह्यब्व:गु समायोजन प्रस्ताव उपयुक्त : माओवादी
एकीकृत नेकपा (माओवादीं) सेनां न्ह्यब्वःगु लडाकु समायोजनया प्रस्तव उपयुक्त जूगु धासें उगु हे प्रस्ताव कथं न्ह्याः वनेगु निर्णय याःगु दु ।
लडाकू समायोजनया मोडालिटि बारे निर्णय यायेत थौं च्वंगु माओवादी स्थायी समिति मुँज्यां सेनाया प्रस्तावय् सहमति यायेगु निर्णय याःगु खः । सेनां थ: मातहत सेना, लडाकु, सशस्त्र प्रहरी व जनपथ प्रहरी दुथ्याका: बिस्कं महानिर्देशनालय दयेका: समायोजन प्रक्रिया क्वचायेकेगु प्रस्ताव न्ह्यब्व:गु ख: ।
थःगु हे लडाकूया नेतृत्वय् मिश्रित फोर्स गठन यायेगु अडान कयाच्वंगु माओवादीं सेनाया प्रस्ताव कथं वनेगु निर्णय याःगु खः । माओवादीं समायोजन जुइगु लडाकुतय् ल्या: धा:सा राजनीतिक पार्टीत दथुइ सहलह याना: निश्चित यायेफइगु धासें लचकता क्यंगु दु । माओवादीं सेनाया प्रस्तावय् सहमति प्वंकूसां पार्टीया वरिष्ठ न्वकु मोहन बैद्य 'किरणं' धा:सा मिश्रति फोर्स गठन जुइमा:गु धासें पार्टी निर्णय प्रति असहमति प्वंकूका: नोट अफ डिसेन्ट च्वयादीगु दु ।
सेनाया प्रस्ताव
प्रधानसेनापतिया निर्देशनय् सैनिक मुख्यालय जंगीअड्डां या:गु प्रस्तावय् सेना, सशस्त्र प्रहरी, जनपथ प्रहरी व लडाकु याना: करिब १०/१२ हजार तकया ‘सुरक्षा तथा राष्ट्रिय विकास निर्माण महानिर्देशनालय’ दयेके फइगु खँ न्ह्यथनात:गु दु । उगु विभागयात सीमा सुरक्षा, वन सुरक्षा, औद्योगिक विकास सुरक्षा, दैविप्रकोप उद्धार व राष्ट्रिय विकास निर्माण लगायतया जिम्मेवारी बीगु धयात:गु दु ।
सेनाया आ:या संरचना कथं उपरथीं नेतृत्व याइगु महानिर्देशनालयय् निम्ह/स्वम्ह सहायकरथी दइगु अले महासेनानी (कर्नेल), प्रमुख सेनानी (लेफ्टिनेन्ट कर्नेल), सेनानी (मेजर), सहसेनानी (क्याप्टेन), उपसेनानी (लेफ्टिनेन्ट) व सहायक सेनानी (सेकेन्ड लेफ्टिनेन्ट) याना: करिब निस: अधिकृत दइगु प्रस्ताव यानात:गु ख: । प्रस्तावय् करिब २ सय ५० जनशक्ति बराबरया गुल्म नांया इकाईया नेतृत्व सेनानीं याइगु व्यवस्था दु ।
News Location:
