म्याद थप यायेत कांग्रेसया झिगू बुँदे सर्त
नेपाली कांग्रेसं संविधानसभाया म्याद थपया निंतिं झिगू बुँदे सर्त न्ह्यने हःगु दु । कांग्रेसया थौं च्वंगु केन्द्रीय समितिया मुँज्याय् नेता शेरबहादुर देउवाया संयोजकत्व नीस्वंगु समितिं तयार याःगु झिगू बुँदे प्रस्ताव अनुमोदन यासें उकियात संविधानसभाया म्याद थप यायेगु सर्त कथं न्ह्यब्वःगु दु ।
पार्टी ज्याथू सानेपाय् च्वंगु कांग्रेस मुँज्यां लडाकु रेखदेखय् सर्वपक्षीय समिति नीस्वनेमाःगु, सहायक शिविरया लडाकुतय्त छगू हे शिविरय् तयेमाःगु, प्यद्वः लाडकु जक समायोजन यायेमाःगु लगायतया दु । झिगू बुँदे प्रस्तावय् कांग्रेसं न्हापांगु चरणया ज्या जेठ १० दुने हे पूवंकेमाःगु खँ धाःगु दु ।
माओवादीं कब्जा यानातःगु सम्पति लितबीमाःगु निसें राष्ट्रिय समितिया सरकार निर्माण यायेत प्रधानमन्त्री झलनाथ खनालं राजीनामा यायेमाःगु सर्त नं कांग्रेसं तःगु दु । कांग्रेसं यदि थःगु माग पूमवंसाः संविधानसभाया म्याद थप यायेत ग्वाहालि मयायेगु स्पष्ट याःगु दु ।
News Location:
