मिसातय् प्राकृतिक हक ५०प्रतिशत : प्रम खनाल
प्रधानमन्त्री झलनाथ खनालं फुक्कं निकायलय् ५०प्रतिशत मिसातय् ब्वति जुइमा:गु इमिगु प्रकृतिक हक जूगु खँ धयादीगु दु ।
व्यवस्थापिका संसद अन्तर्गतया महिला, बालबालिका तथा समाजकल्यण समितिं थौं प्रधानमन्त्री नाप काःगु स्पष्टिकरणया झ्वलय् प्रधानमन्त्री खनालं थीथी हुनिं अझ नं राजनीतिइ मिसातय् ३३प्रतिशत ब्वति जुइमफुगु धयादिसें मिसातय् प्रकृतिक हक ३३प्रतिशत मखुसें ५० प्रतिशत हे जूगु धयादिल ।
फुक्कं सरकारी निकायलय् मिसातय् ३३प्रतिशत ब्वति मजूगु धासें समितिं काःगु स्पष्टिकरणय् प्रधानमन्त्री खनालं मिसातय्त ३३प्रतिशत ब्वतिया निंतिं सरकारं कानून बमोजिम लागू यायेमाःगु फुक्कं प्रावधाण पूवंकेधुंकूगु जानकारी बियादिल । मन्त्रिपरिषद् अझ नं पूर्णरुपं विस्तार मजूनीगुलिं सरकारय् मिसातय् ब्वति म्हो खनेदुगु धयादिल ।
राजनीतिक दलया नेतातय् गलत प्रवृत्तिया हुनिं थीथी थासय् अझ नं मिसातय् समान प्रतिनिधित्व जुइमफुगु स्वीकार यानादिसें वय्कलं थः एमालेया नायः जूसां थःगु पार्टी दुने थःगु नियन्त्रण मदुगुलिं मिसातय्त राजनीतिइ एक तिहाई थाय् बीमफुगु धयादिल ।
